AmiGo VLR Hnamte Says

SORKAR TAN TLAWMNGAIPAWL TE AN PAWIMAWH FO

2011-09-11T14:31:00.000+05:30

Dik leh felfai zawka thil tih a nih theih nan Mizoram sorkar hian kawng tam takah TLAWMNGAIPAWLTE a belh chhan fo thin a, Ration Card siam that leh Electoral Roll dik taka siam that a nih theihna tura thawhpui tawhna te chu a langsar zual a ni. Heibakah hian dik taka rorel a nih theih nan committee pawimawh tak takah sorkar hian tlawmngaipawl zinga lian deuh deuh aiawhte hi a dah bawk a ni. Electoral Roll leh Ration Card dik tak kan neih theihna tura tlawmngaipawl te’n sorkar a tanpuina hian kawngro a su hle tih chu kan hre theuh awm e. Hetiang tlawmngai pawl lian tak kan nei hi khawvel hmundang a mi te’n an awt em em reng a ni. Chutiang chu a nih avangin sorkar pawhin a pur fo tlawmngaipawl liana a hruaitu leh a phusa deuhte pawh mi rinawm leh nungchangah pawh midangte entawn tlak nih a ngai a ni.

Thawkkhat lai khan Ration Card chuang atam avangin sorkar chuan dik taka siam turin tlawmngai pawl a thawhpui a, 100-a 100 chu tidik thei lo mahsela, lungawina khawp chuan siam that a ni ti ila a sual awm love. Chutiangin nikum lamah khan NLUP hnuaia chhawmdawlna dawng thei tur thlanna atan chhungkaw dinhmun dik taka hre thei turin tlawmngaipawl sorkar chuan a thawhpui leh a, chuta tang chuan sorakrin NLUP dawng tur a thlangzui thei ta a, a thlannaah tak erawh chuan tlawmngaipawl lian aiawhte hian tel zui tul an ti lova. NLUP dawng thei tur dik taka thlan an nih theihna tura chhungkaw dinhmun enfiah erawh chu an ti a ni. Hetiang hian sorkar chuan tlawmngaipawl a thawhpui fo a ni. Nungcha humhalh, Kangmei ven, ruihhlo leh zu khap chungchangah te, AIDS leh Malaria bakah hmasawnna tura programme hrang hrangah tlawmngaipawl te’n sorkar an thawhpuina hi ramchhung hmundang kan thlir chuan Mizoram chu a chhuanawm viau a ni. Dan lova Mizorama khawsa, sumdawng, hnathawk leh kawng dang danga chambangte dap chhuak tur leh Dan kenkawh a nih theih nana mipui leh tlawmngaipawl te inpekna hi thil pawimawh tak a ni. Amaherawhchu Dan kengkawtu ang maia an khawsak chu a dik lovanga, chutih rual erawh chuan Dan kengkawha thawktu turte’n an mawhphurhna an tih loh miau chuan, a ţûlna avangin tlawmngaipawl chauh pawh nilo, mimalte pawhin Dan bawhchhetute chu zawng chhuakin thuneitute an hriattir emaw an finchhuah emaw a hun a thleng thei ang. Rukru leh kawng dang danga pawikhawihtute man chhuak turin police kut kher kan ngah a tul fo lo, a hre hmasa a piang chet chhuah a ngai a, amaherawhchu thuneitute hrattir leh an kuta mawhlhurhna hlan vat chu kan tih tur a ni. Chutiangin phalna neilova ramdang mi, chhan hrang hrang vanga Mizorama awmte dap chhuah hna pawh hi a mawhphurtu lamin an tlin loh chuan, sorkar tanpui tur leh tawimawm tura mipui leh tlawmngaipawlte an pen chhuah a tul zel dawn a ni mai thei. A enga pawh chu nisela, Dan hnuaiah, Dan bawhchhetute chu Dan hmanga hrem an nih theih nan a tuate pawhin sorkar kan thawhpui thiam tur a ni a, Sorkar lam pawh tlawmngaipawlte thawhpui tura a insiamrem a tulna chin a awm ve ngei ang.

Mizo hmeichhe tleirawl zingah sualna hluar

2011-08-20T17:03:00.000+05:30

Kan ngaihhlut zawng chuan kan ngaihtuahna leh hmathlir pawh a kaihruai thin a ni. Chuvangin kan ngaihhlut zawng chu thil tak tak, a lem ni lo, sawimawi chawp pawh ni lo, cheimawi chawp pawh ni lo, a nihna dik taka ngaisân awm leh ngaihhlut tlâk, tlo leh chhenfâkawm a ni tur a ni. Chu chu ngahhlut chhan tur pawh a ni. Nimahsela tunlai hian hmeichhe tleirawlte ngaihsan zawng, thil hrang hrang te hi chuan an nun a hruai sual mek a, hmeichhe tleirawl buaipuiawm tak tak an pung ta zel mai a nih hi. Thenkhatte phei chu Setanic tia kan sawi kawng zawh te pawh an ni. Pathian thu tha leh an nun kaihruai thei tur thu ţha tak tak aiah khawchhak film star leh milem duk dak lo tak tak te chuan an room bang a luah ta zawk a, computer neite pawhin hetiang lam hawi thlalak hi an khawnkhawm deuh zel a ni.Thil sual lian takin lang lo mahse, an rilru leh ngihtuahna chu an ngaihhlut zawng hian awmze neiloin a hruai bo mek a ni.

Kumtling lo tak tak-in mobile phone an hmang a, chutiangin internet an hmang bawk. Hei hian a bik takin hmeichhe tleirawl ho a hruai sual nasa hle nia hriat a ni. Hei hi chu Mizoram-ah chauh nilovin khawvel pumpuiah a ni. Hmangsual an tam avangin kan ngai naran mai tur a ni lovang. Mimal nun, chhungkua leh society a tihchhiat miau avangin kum tling lo hnenahchuan heng thilte hi phalrai loh a him a ni.

Tunlaia hmeichhe tleirawl zinga sualna hluar zel ti tlem tur hian khawi atanga tan lak tur nge ni ang ? Nu leh pa tam tak chu an fate kaihruai turin an mah nin an zir bik lo. Nimahsela chhungkua atanga bul tan a ngai si. Fa te nungchang enzui peih tawk loh vang te leh thunun tawk loh vangin mi tam zawk chuan harsatna kan tawk a ni. Nu leh pa thenkhat chuan tunlai thiamna leh hmasawnna thenkat kan hmelhriat loh vangin, fimhur dan kan hre lova, kan thiam bawk lo. Ngaihhlut tur dik kan fah hneh tawk lo te pawh a ni thei ang.

A aengapawhchu ni sela, tunlai hmeichhe tleirawl zinga sualna hluar ti tlem tur hian nu leh pa, zirtirtu te leh khawtlang hruaitute thanharh a tul tak meuh meuh a ni. A zirchianna pawh neih ni sela, chuta tang chuan hmalak dan tur ţha a hriat leh zual ang. Heimi chungchangah hian hmalakna kan neih loh chuan tun atanga rei lo te-ah kan khawtlangah nasa zawkin harsatna a thleng ngei dawn niin a lang. School kal chhunzawm thei lo, ngawl vei, sawn pai, kum tling lo innei, chhungkaw keh darh leh KS an pung dawn tihna a ni.

ETHICS COMMITTEE HI INNGHAHNA TLAK NI NGEI RAWH SE

2011-06-25T10:03:00.001+05:30

Mipui beisei ang ngeiin kum 2009 January 29-a Aizawl Tourist Lodge-a –Congress party Executive meeting chuan Ethnics Committee a din ta a, mipui an lawm hle a ni. Din a nih hnu lawk, February ni 18-a Mizoram Presbyterian Church Synod Executive Committee member-te leh Mizoram Legislative Assembly member thlan tharte’n Pi Zaii Hall, Synod Conference Centre-a inkawmna an neih tuma Home Minister-in, sorkar hnathawkte bakah Minister thleng pawhin corrupt deuh nia an hriatte chu Chief Minister hnenah chawlhtir turin Ethics Comitee-in hian huai takin thlen mai thin se, a tih te khan mipui min thlamuan a, sorkarah beiaseina sang tak kan nei a ni. Nimahsela beiseina sang tak nena mipuiin kan thlir laiin an hmalakna lang tham awm lovin term khat an hmang zo ta mai a, sorkar thara inrelbawlna danglam ‘ change ’hmuh kan beisei kawg khat chuan awmzia a nei dawn ta lo emaw tih theih a ni.

Hetianga Ethics Committee chungchanga ngaihdan a awm mek lai hian, term hnihna Ethics Committee chuan Chairman thar Rev C.Rosiama hovin hma an han ve leh ta a, Chairman chuan, Sorkar thawhpuitu tur an ni a, sorkar hnuaia department ang chu an nilo tih sawiin, dik tak leh huaisen taka sorkara thurawn petu tur, thil fello leh diklo awm tur laka sorkar venpuitu, sorkar rintlak leh belhchiandawl neih dan kawng kawhhmuhtu tur an nih thu a sawi a. Tute emaw hawlfung mai nilova, corruption awm thei ven leh, a that lohzia mitin thinlunga tuh chu an thil tum a ni tih a tarlang a ni.

Sorkarlai party-a nihna nei lo, mirinawm leh kawng dang danga nihna pawimawh tak tak chelh mek, committee member te kalpui tur Ethics committee hmalak zel dan tur hi mipui pawhin tunhma aimahin an ngaichang zui dawn a, member te hian mipui beisei tihlawhtling turin an mawhphurhna rinawm taka an hlen a ngai a, eng political party mahin hlemhletna thup zawngin an thununin an khalh kawi tur a ni lovanga, dik taka hna an thawh theih nan opposition leh ruling party te’n an serh hran a tul a ni. Chairman tharin a sawi ang hian tute emaw hawlfung maiah an ţang tur a ni lova, belhchian dawl leh huai taka hma an lak tak tak chuan Congress kaihhruai Mizoram sorkar inrelbawlnaah hian, hmasawnna lian tham a thleng kan ti thei ang a, corruption dona kawngah rahbi thar kan rap kan ti thei ang. Chuvangin Ethics Committee hi mipuite beisei ang ngeiin innghahna tlak ni ngei tawh rawh se.

MLTP ACT

2011-06-02T12:09:00.000+05:30

Mizoram hi kum1972 kumtir khan U.T–a hlankai kan ni a, a kum leh 1973-ah khan Mizoram Excise Act, 1973 chu siam a ni a, chumi hnu Kum 10, kum 1983 khan Mizoram Excise Rules chu siam a ni leh a, ti chuan 1984 October thla atangin Mizoram Excise Act chu hman a ni ta a ni. Kum1986 February thla-ah State puitlinga hlankai kan ni a, Excise Act leh Rules hmang hian Indian Made Foreign Liquor, ( a sen chi ) kan tih mai chu phalna neia zawrh a phal a ni zui ta a ni. Phalna neia Zu kum 9 vel zawrh a nih hnu, kum 1995 khan Zu khap Burna dan, The Mizoram Liqour Total Prohibition Act chu siam a ni a, Dân tesep te duang zovin 1997 February ni 20 atangkhan vawiin thlengin The Mizoram Liqour Total Prohibition Act hi hman a lo ni ta a, thangkhat lian dawn kan hmang ta a ni.

Tunhnaiah Mizoam sorkar chuan ‘The Mizoram Liqour Total Prohibition Act’ zir chiang tur bik, Study Group a siam a, CYMA, MHIP, MJA, Mizoram Bar Association, Zoram Taxi Owners Association leh Mizoram College Teachers' Association-te chuan MLTP Act hi a hlawhtling tâwk lo-ah an ngai a, MUP leh Mizoram Acedemy of Letters chuan a hlawhtling thawkhat an ngai ve thung a ni.

MLTP Act chungchanga ngaihdan inang tlangpui chu – ‘ a hlawhtling lo ’ tih a ni. He ngaihdan hi ‘ Khap burna Dan ‘ a nih anga kenkawh a nih lohvang a ni ber. Chuvangin MLTP Act hi hlawhtling tawk lova pawl tam zawkin an ngaihna chhan chu, a kengkawh tura mawhphurtuten an tih tur an tih tawk loh vang a tih theih a ni.

Tunţuma MLTP Act- Study Group ten Pawl hrang hrang leh mipui ngaihdan an lakkhawm aţang hian sorkarin hmalak zel dan tur mumal tak nei ngei sela, kal zel dantura mipui duh dan pahnih a awm, khauh zawka kalpui leh tih tawp a ni deuh ami. A eng zawng zawng pawhin huai taka kalpui turin inbuatsaih sela, party hrang hrang kaihhruai sorkar hnuaiah pay anomoly chungchang leh thil dangah committee leh mawhphurtu din a ni fova, chung Committee rawtna chu a zuzi leh fo thin. Tun tuma Study Group te hian rawtna an siam turah ngai ila, an rawtna chu sorkarin hmang tangkai ngei the se.

HNAMDANG MISTIRI KAN DARTHLALANG

2011-05-15T08:02:00.000+05:30

Tunhnaiah khan Central YMA chuan Mizorama hnam dang mistiri hlawh chu Rs 300/- aia tam lo ni se, tiin an rel.YMA committee sangin Mizorama hnam dang mistiri hlawh chungchang a a buaipui ta hial mai a, hei hian kawng thenkhata Mizoram dinhmun a tarlang a, chuchuan kan tih tur pawh min kawhhmuh nghal a ni.

Pakhatnaah chuan Mizoram leh a chhunga cheng Mizote Hnamdang Mistiri te hian an duh zat zat-in an hlawh an tuk thei. Hei hian chiang taka a lantir chu Mizo zingah tun thlengin hnamdang mistiri-te thlak thei khawp cement mistiri kan la nei lo tih a ni. An tellova khawsa thei lovah mindahnghet hle a, min induhkhum thei a ni.

Pahnihnaah chuan Central YMA-in hnamdang mistiri rate tihniam tura hma a lak laiin Mizo mistiri lamin an ‘rate’ an san ve hlauh a, hei hian a lantir chu hnamdangten kawng tam taka min chimpilna kawnga inveng turin kan inthurual thei lo tih hi a ni. Hman deuahah khan Silchar boruak avangin Mizoram atangin hnamdang sumdawng tam tak phai lamah an hawng thla a, Mizo chhungkaw tam takin hmun lailiah dawr an neih phah thung a, lumehna dawr tam zawk pawh Mizo tlangvalin an kalpui a, tunthlengin Mizo chhungkaw tamtakin dinchhuah nan leh eizawnna mumal an neih phah ta a ni. Harasatna kan tawh kha kan hmangtangkai ti ila a dik mai awm e. Tun tumah hian kan tangrual zo ta lo a ang.

Pathumnaah chuan labour te hlawh bituk chungchangah mumal taka Dan kengkawh tur an awm lo. State pawn atanga lo kal hnathawktute'n an duh ang tawka anmahni hlawh zat an intuk thin hi chu a fel lo a, chutiang bawkin Mizo mistiri te pawhin an duh ang zat an intuk mai pawh hi a dik chuang lova, YMA-in a tuk pawh hi Dan a ni chuang lo. A ti tu turin a tih loh vangin kan sapatal tlang a ni.

Sorkar hnuaia MR emaw labour emaw te hlawh chu sorkain mumal takin Order hmangin a siam fel mai thei a, private sector/ mimal hnuaia inhlawhte hlawh chungchang hian ngaihthah a hlawh a, mahse sorkar chuan tih theih a nei ngei tur a ni. Mimal hnuaia thawk mek, mistiri leh labour te himna tur Dan pawh ngaihtuah ngai zingah hian a tel a ni. Contractor hnuaia mistiri chuan a hnathawhna hmunah vanduaina lo tawk ta sela, a ruaitu-in engchen nge mawhphurhna a neih tithe pawh kan ngaihtuah ngai lo. Motor accident-ah a khaltu driver chu lo thi palh ta sela, a ruaitu leh motor neitu mawhphurhna leh tihtur emge pawh kan ngaihtuah ngai lo a ni mai thei. Mimal hnuaia hnathawkte hlawh bituk chungchangah hian an hlawhbi tuk ngawr ngawr bakah an hamthatna tur leh himna tura lam pawh thlir tel a tul a ni.

Engpawh nisela, hnamdang Mistiri hlawh chungchanga sawi tur lo awm ta hian, sorkar leh a mawhphurtu Department te inenfiah nan hmang thei sela, Mizo hnam tanrualna hunah hmang thiam bawk ila, Mizo thalaite'n chonaah ngai se, lehkhathiam hna hmu lo heti zat an awmlai a, hnam dang mistiri-te zawk hlawh bithliah ngai khawpa an awm ta hi inhmuhchhuah phah thei ila ka va ti tak em !!!!!!.

CHAURAU ÊK KAN THAI

2011-04-10T07:55:00.000+05:30

Mit a mim chuan Fairelbêl zen a ţha tih te leh a letling zawnga piangin mi an zût dam thei han tih te chu tunlai finna leh thiamna atanga teh chuan thil nuihzatthlâk tak a ni. Nimahsela mi thenkhat chuan kan la ti tho mai.

Tawngtai damthei panin kan inkal thelh reng a, hemi zulah hian Mar-deh atanga natna hriat theih te, taksa khawi lai lai emaw indapa natna hriat theih leh damdawi inchawhte pawh sawi tur a awm reng bawk. Thâ leh ruhna zût dam thei pawh khaw tinah kan nei emaw tih mai tur a ni. Damdawi mahnia inchawh mai leh thiamna nei tak tak lova midang chawh mai thin kan tam hle a, nachhawkna leh hritlang damdawi, khuh dam dawi leh kawthalo damdawite phei chu mahni inchawhchawpa kan ei hi a tam zawk ang.

Taksa damna kan buaipui em em lai hian a inenkawl damna tura kan mawhphurhna leh tihtur dik tak erawh chu kan hlamchhiah fo. Hunbi dik taka damdawi ei leh ei zât tur dik tak ei kawngah hian kan hnufual tlat. Damdawi Ina kan awmna chhan zinga pakhat pawh a ni. Thingtlang khua chauh nilovin, Aizawl leh khawpui dangah ngei pawh, In tinah damdawi ei zawh tâk lo, bangrelah kan tlar thliah thluah mai. Chutiangin a mûm lam chi pawh kan khâwl ruih hlawm anih hi !

Technology-a chak taka hma sawn mek, nimahsela dam loh ve leha doctor inentir chauh thin Mizo te hian, Damdawi inchawh, ei leh hman dan dik ngaihpawimawhna chungchangah hi chuan ‘chaurau êk kan thai’ a ni ber e.

SORKAR SUM LEH MIPUI TE

2011-04-03T11:22:00.003+05:30

Sum dinhmun hian sorkar chauh pawh nilovin, Kohhran leh pawl zawng zawng nihna diktak a pholang ti ila kan sawi sual awm love. Chuvangin Kohhran leh Pawl awmze nei chin chuan Budget emaw action plan emaw an siam ngei ngei a, chu chuan an hmalakna tur leh thiltih-ah ro a rel zui thin. Chutiang chu a nih avangin Kohhran leh Pawl-ah pawh sum dinhmun enfiah tur leh a hman dan enfel turin pawn lam mi emaw mithiam tutee maw ruaiin sum endik tir an ni thin. Kohhran thalai sum kawl thlengin endik tu te kan endik tir thin a ni. Tih dan phung pangngaia endik liam mai mai chi a nil ova, chuvangin committee-in a endik tur pawh relin a ruat thlap thin a ni. Chutiang chiah chuan State Sorkar sum hman dan pawh Accountant General of India-in a endik thian a, sum hman dan tura ruahman ang thlapin kalpui a ni em tih leh dik takin hman a ni em tih endik a ni thin a, hemi piahah hian sum lakluh dan tur leh lakluh theihna tura ruahman angina sum lakluh a ni em tih te pawh enfiah tel vek a ni bawk thin a ni.

Mizoram sorkar sum hman dan-a felhlel deuh nia lang sar zual chu CAG Report thar berah chuan tar lan a ni a, chung zingah chuan sorkar Department lam fel tawk loh vang te, politics thil avanga ruahmanna fel tawk lo nia ngaih theih te leh mipui pawhin sorkar leh thuneitute kan nawr chiai avang leh kan rinawm tawk loh vanga sum hmanna fel tawk lote pawh a awm niin a lang a ni.

Sorkar Department tan hian CAG duh ang diak diaka sum hman a remchan loh chang a awm ve thei. Nimahsela, mipui leh sorkar tana sum chu hman a nih phawt chuan a la tha tho a ni.

Engpawh ni sela, sorkar hian sum dik taka a hman theih nan mipuiin tih tur kan nei a, mipui mawhphurhna tam tak a awm a ni. Minister leh Department hotu ten dik taka thil tih an duh laiin, mipui lamin dik tawk zan lova thil ti turin kan nawr ve bawk thin. Chuvangin CAG report-a sum hmanna fel tawk lo te pawh hi mipui leh mimal thil tithei deuh te’n sorkara thuneitute kan nawr thin vang te pawh a ni ve thin. Chuvangin CAG duhdana sum enkawla hmang tur chuan mipui pawh hian mawhphurhna kan nei tih hriain, sorkar hotute pawh diktaka thil ti thei turin nawr chiai lo ila, chu chu kan zavaia tan hmasawnna rahbi pawimawh tak a ni dawn a ni. Sum hmanna dik lo tlangpui

CHAPCHAR KUT

2011-03-04T08:29:00.005+05:30

Hetih lai hian intih changkanna vanga Mizo hnam ze hlauh zawnga khawsak erawh chu a hlauawmahle a ni. Mizo lâm leh inchei zahpui te pawh Mizo thalai zingah an awm a ni awm e. chungmi te chuan hnam dang lam leh zai an chawi vul zawk duh châwk a ni. Hnam dang zai leh lam pawh kan thiam chu a sual love, kan inchei danah pawh a hun leh hmun a zirin a Mizo reng thei kher lovang, a hriatthiamawm chin a awm mai. Mizo incheia inchei reng turin intihluih chi pawh a ni chuang love. Tuna kan Chief Minister nupui inchei duh dan hi Mizo hmeichhiate tan chuan entawn tlak a ni an ti thin. Mizoram pawnah pawh Mizo hmeichhe incheina bak a pel lo a ni awm e.

Mizo hnam bila Kût kan hman theih ve chhun Chapchar Kût hi khawvela kan inphochhuahna remchang ni thei turin a hmandan hi tih phuisui deuh deuh a ngai a ni. Khawvel hmun danga Kohhran zaipâwl rawngbawltu kal chhuak te’n kan hnam inchei dan, zai leh lam hrang hrang te pawh an entir thei ta a ni. Hei hian Mizo Kristiante tan Pathian rawngbawlna dal lovin mahni Culture a pho lan theih tih a ti lang chiang hle awm e.

Chapchar Kût hi Mizo hnahthlâk ten kan hlut deuh deuh a ţûl a, a hman dan leh a ruahmanna-in a zir chuan hun lo la kal zel turah kan hlut deuh deuh thei ang, chuvangin tuna kan tihdan hi duhtawk mai lovin hmathlir thui tak neia ruahmanna siam turin rilru zau tak kan put ţheuh a ngai a ni.

TEARS

2011-02-25T05:46:00.000+05:30

Evidence of our Creator is all around us—from the miracle of the atom’s intricate internal structure, to the design of the most complex piece of matter in the universe, the human brain. Scientists have found God’s greatness even in one of the most minute phenomena—human tears. Emotional tears are a response which only humans have, for only people can weep. All animals that live in air produce tears to lubricate their eyes. But only people possess the marvelous system that causes crying.

One amazing discovery is that tear production may actually be a way to aid a person to deal with emotional problems. This finding lends some basis to the expression, To cry it out helps a person feel better. Scientific studies have found that after crying, people actually do feel better, both physically and physiologically—and they feel worse by suppressing their tears. The simple act of crying also reduces the body’s manganese level, a mineral which affects mood and is found in up to 30 times greater concentration in tears than in blood serum. They also found that emotional tears contain 24 per cent higher albumin protein concentration than tears caused by eye irritants.

Weeping contributes not only to the health of the individual, but also to the group’s sense of community and that it tends to deepen involvement in the welfare of others. Tears are an extremely effective method of communication, and can elicit sympathy much faster than any other means. They effectively relate that you are sincere about a certain concern, and anxious to deal with the problem.

One of the most obvious functions of tears is to lubricate your eyeball and eyelid, but they also prevent dehydration of your various mucous membranes—and anyone with the ‘dry eye’ problem knows how painful this can be. Onions make you cry because they release a chemical which turns into sulphuric acid on contact with your eye surface. But your tear reflex renders the sulphuric acid almost harmless.

MIZO (DUHLIAN ) TAWNG ( Mizo hnahthlak inpumkhat nan )

2011-02-12T18:14:00.003+05:30

Dt.4^th Feb.2011 khan Chhimtuipui Academy of Letters, Lawngtlai Academy of Letters te leh Mizo Academy of Letters Joint Headquarters Lunglei te buatsaih-in “ Zohnahthlak Inpumkhatna Seminar” Saiha Council Veng-a District Industries Centre, Conference Hall-ah neih a ni. He Seminar ah hian “ Zo hnahthlakte inpumkhatna pi pu te serh leh sangah”tih leh “ Zo hnahthlakte inpumkhatna Ei leh Bar zawnna-ah” tih paper mithiamte buatsaih chu zirho a ni.

Hemi tuma seminar thupui-ah hian ‘Zo hnahthlak ‘ tiia hman a ni. Mizo Academy of Letters pawh hian Zohnahthlak tih chu an hmang a, chuvangin Mizo hnahthlak tih leh Zo hnahthlak tih hi chu kan hman pawlha kan pawm tlang a tih theih ang.

Mara ţawng leh Duhlian ţawng hi Kuki-Chin hnuaia awm ve ve an ni a, ţawng inhnaih tak an ni. Mara leh Mizo hi Hmar leh Mizo aiin a inhnaih zawk a. Hetih lai hian Mizo tawng, Duhlian tawng tia kan sawi bawk thumal tam tak chu Lai ţawng a ni. Chutiangin Hmar tawng leh Mizo tawng chu kan inhriat tawn sak thei vek. Heng Mizo hnahthlak zinga ţawng hlawm hrang pathum zingah hian Mizo tawng hmangtu hi an tam ber a, a hmangtu pawh an pung zel a ni. Chhim lama Lai ţawng hmangte zingah Mizo tawng a lar tial tial a. Lawngtlai khawpuiah tak phei chuan Lai tawng hmang an awm ta meuh lo. Chutiangin Saiha-ah ngei pawh Mizo tawng a lar tial tial a ni.

Mizo hnahthlak hnam hrang hrangte tawng zinga lar ber leh thang chak ber chu Duhlian (tuna Mizo ţawng kan tih tak ber) hi a ni. Tun atanga kum engemaw zatah phei Mizo hnahthlak hnam hrang hrang ten kan la hmang vek ang tih chu rin dan tlangpui a ni. Amaherawhchu, heng Mizo ţawng dangte hi a tibo tur emaw, hnawl vek tur zawng hma lak erawh chu a tha ber kher lo mai thei a ni.

Zawi zawiin Mizo ţawng hian Mizohnahthlak te hi minla khuh vek dawn a, chu chu rilru zau takin nghak ila, Hmar, Mara leh Lai tawng atangte pawhin Mizo ţawng tam tak thawh khawm ila, chu chu lungawi takin pawm thei ila, Mizo hnahthlak inpumkhatna tur atan thil pawimawh tak a ni ngei ang. Ţawng avanga indaidanna hian khawvel hmun tam takah politics tha lo a kai harh fo tawh thin a, hnam inpumkhatna a tichhe nasa thei hle a, inrelbawlna hran te hial pawh a piang thei a ni.

Mizo hnahthlakte inpumkhatna tur hian thu leh hla lam atangin nasa taka ţan lak theih a ni a, sakhuana lamah chuan Kristian kan ni vek tih theih a ni a, kan ei leh in lamah duh dan hrang a awm lo. Ţawng lamah pawhnisela inhnaih te te a ni hlawm a, Duhlian tawng hmangte pawhin Hmar, Lai leh Mara tawng thumal leh hming engemawzat kan hmang mek mek tawh thova, ‘Mizo ţawng a ni lo’ ti mai lovin Mizo ţawng huang chhungah seng lut zel thei turin rilru zau tak pu ila, Kan ţawng hmangin Mizo hnahthlakte kan inpumkhat deuh deuh thei dawn a ni.

BRU....BRU...BRU..!!!

2011-01-22T21:08:00.003+05:30

Kum 2005 khan BNLF 195 chu sorkar kutah an inpe a, kha mi tum kha Bru hel inpêk hmasak ber ţum a ni. Hemi ţum hian Bru hel zawng zawng an inpe vek lo tih hriat a ni a, inpe bang erawh tlemte an nia ngaih a ni. Hemi hnu, 2006 October ni 26-ah khan BNLFM hel 800 chuang inpe tur an lo awm leh hman a ni. Chutiang bawkin tun tuma Mizoram Bru dik tak la let tura hma laknaah pawh hian vawi tam tak Bru te hian thil phut an siam belh tawh a, tunhnaiah sorkar nawrna avanga lo kir lo thei lo an nih dawn avangin Mizoram Bru ni lo, Tripura leh hmun dang aţanga Mizoram Bru Tripura Camp-a awmte fin tu Mizoram pawn Bru engemaw zat chu Mizorama an rawn luh ve theihna turin kawng an dap nia ngaih theihin hma an la ang hle a ni.
Mizoram aţanga pêm chhuak Bru te lo kir lehna tur hian Mizo mipui lam hi chuan harsatna an siam niin a lang lova, Bru lam zawk hian an duhthusama awmzui dan dapin sorkar ruahmanna chu her danglam turin theih tawp an chhuah a ni ber a, chutih lain mi ţhenkhat chuan Bru hruaitute zingah Refugee Camp-a sorkar enkawlna behchhana hamţhatna zawng te avangin Bru laklet kawngah hengmi te hian thiam takin harsatna an siam niin an sawi thung a, he ngaihdan an mahni Bru zinga mi, Mizorama rawn kir leh duh engemawzatin an pawm nia sawi a ni bawk a ni.
Politics thila an hnam hamţhatna ngaihtuah ve rân nia ingngaiin Bru pawl hrang hrag te chuan Mizoram politics-a Bru hnam chu nghet taka kaih luh an tum niin a ngaih theih bawk a, bing taka Bru chen ho duhna te chu an nei lian hle tawh a, Village Council bakah MLA inthlanah hial pawh an hnam bil pawimawh theih dan dapin ruahmanna an siam zel ti ila a sual awm love. Heng zawng zawng hi politics thilah chuan leng vekin lang mah sela, Mizoram thendarh zawnga hma lakna reng reng chu mipui tam zawk hian nasa takin an do zel a, an la do deuh deuh dawn niin a lang. Chuvangin Bru unaute hian an thil tum tam tak hi chu an suih zuih a ngai rih dawn niin a lang.
BNLF hel pâwl ten a tira an phût kha kan la hre ţheuh anga, an hnam bil hamţhatna tur atana thuneihna hran siam leh, inhung hran kha a ni a. Hmanruaah silai lekin helah an lût ta a ni. Tripura velah inkulhin Mizoramah thâwm an rawn nei ţhin a, state ralmuang nia kan lo sawi ve-ah hian hel min neih tir ta a ni. Anmahni avangin thisen pawh a luang a, tlawmngai pawl ţhenkhat te pawh chibing politics do turin an thawk chhuak hial a nih kha. Hetiang hi a nih avangin BNLF te khan an pawi khawih avangin Sorkar leh Mizo mipuite hmaah thupha pawh an chawi hial a nih kha, chuvangin tun tumah pawh hian sorkar ruahmanna ang leh Mizoram chhunga mipui te duh angin ruahmanna hi pawmin lo kir phawt mai se la, an lo kir duh lo te chu sorkar hian ngaihtuah zui lo ngam bawk sela, sorkar nen an inrem tawhna te chu sokar pawhin tipuitling ngei bawk sela, tih fel vat a nih loh chuan misual thil tih avangin harsatna dang a thleng leh palh thei a, Refugee Camp-a awm Bru te tân phei chuan a ţha lo leh zual a ni.
Bru te hian Mizoram mi diktak bak chu zakkep neih tum lui lo sela, Mizo mipuiin lungsi taka an pawm theih tur ngei nih tum sela, silai tunga khua leh tui ţha ni tura inpe an ni tawh bawka, an mipui te tan pawh dik taka thil an tih zui zel a pawimawh tawh dawn a ni. Sorkar pawhin fimkhur taka thil a tih a ţûl a, remna siamtu nih chu a ropui rualin belhchian dawllo leh rinawm lo fe fe remna siampui palh a awm thei a, chuvangin Mizorama tlawmngai pawl te pawh hian sorkar kaihza venga Bru lo kir turte lo kir tum dan thar leh leh lo kir tawhsa te khawsak zui dan pawh fimkhur leh uluk taka thlithlai tul hle dawn a ni.

Continous Comprehensive Evaluation

2011-01-22T20:43:00.002+05:30

Mizoram sawrkar chuan Khawvel mil zirna chhawp chhuah tuma a hmalakna ah kumin a tang hian system thar Continous Comprehensive Evaluation hman ani anga he system- ah hian Zirlai naupang chu Pawl riat an zir tleng in an sikul atanga hnawhchhuah leh pawl ngaia suk tir a awm dawn tawhlo a, Pawl 8 High School-a awm thin pawh Middle School-ah rin luh a ni dawn a ni.
Hemi chungchang-ah hian Education Minister chuan Mizoram-ah Zirna tih hmasawnnan Reform Commission din tawha nih thu leh tuna System thar hman tur chu khawvel ram changkang zawk te pawn hlawhtling taka an lo kalpui tawh a nih thu sawiin, Mizoram-ah pawh a hlawhtlin ngei a rin thu ‘Training of Key Resource Persons on Continuous and Comprehensive Evaluation’ SCERT Auditorium-a thla hluia neih tumin a lo tarlang tawh a, hemi tum hian Zirna kalphung hi System dika kan tlak luh fuh phawt chuan Mizote hi kan nep lo a ni tih sawiin tunah la hla deuhin lang mah se World Class Education hi neih ngei tumin tan lak ani a, hmabak kawng chu chho mah se a hlawhtlinna thlirin phur taka kal mek a ni tih a sawi a ni.
Mizorama zirna chungchang hian sawi a hlawh reng a, a kalphung pawh tihdang lam hret hret a ni fova, tun tumah pawh hian System thar kan han hmang leh dawn ani a, Minister sawi ang hian hlawhtlinpui ngei turin kan tan tlan a ngai a ni. Nu leh pa lam pawh kan tan a ngai dawn hle a ni. Lehkha thiam hna hmulo tam chhan-ah pawh hian hnamdang nena khaikhin raslah chuan kan thiamna a ril tawk lo fo nia sawi a ni thin.
Zirna system that tawk loh vanga zirlaite hlawhchhamna hi a chhan lian ber pakhat nimahsela inthununna (discipline) leh khawtlangin zirtlaite enkawlkan thiam loh chuan hlawhchhamna chhan tur dang tam tak a la awm a ni. Kohhran thalai-a inhman te, YMA leh tlawmngai Pawl danga zirlaite an inhmang nasa lutuk hi Zirlaite chhiatna chhan pakhat chu a ni. Hei hi Education Reform lam atanga khawih theih a ni lova, nu leh pa leh kohhran leh khawtlang hruaitu ten hma an lak vena tur pawimawh tak a ni. Zirlaite hi an zirna kawnga an hlawhtlin theih nan serh hrang thiam ila, an tel lovin kohhran a kal thei lo pawh a ni em lova, hemi kawngah hian kohhran leh khawtlang hruaitute pawh kan inbih chian angai ve bawk a ni.
Nikum khan Sorkarin School naupangte Uniform thui dan tur chungchangah leh thil dangah hriattirna a chhuah a, pawnfen chhing lutuk te, kekawr zuih lutuk leh sam enkawl dan thlengin a ruahman a ni. School luhtan atang hian hei hi khauh taka kenkawh a nih loh chuan a zuzi chho leh mai ang tih a hlauhawm hle a ni. Tunah hian USchool Uniform pawnfen chhing tak tak feng hmuh tur an awm leh ta nual mai, sorkar thupek kenkawhna kawnga mawhphurtute an chet vat a ngai a ni. Fashion hi zirna kawnga inthununna ( discipline ) tichhetu lian tak pakhat a nih avangin education system thar eng ang pawh hmang ila, inenkawlna leh invawnna lam a that si loh chuan a pamhmai thlawn ting mai dawn a ni.Engpawh ni sela, Zirna kawngah hian tihdan tha leh thar pawh hmang thin mah ila, Mizo Society bikah hi chuan zirlai te kan serh hran thiam a ngai a, kan society zalen takah hian zirlaite tan thununna leh kaihhruaina tha kan neih si loh chuan zirna kalphung thar-in awmzia a nei thui thei tak tak lovang tih a hlauhawm a ni.

PRE-CHRISTMAS NGE ADVANCE CHRISTMAS

2010-12-25T07:36:00.001+05:30

Tunhma deuh chuan Christmas hi mahni kohhran bila hmang lovin khua leh vengin hmunkhatah hman a ni thin a, tunlai angina a behbawm thil tam tak a awm lova, lenkhawm, chhang den, ruai theh leh naupang tan thawmhnawthar lei leh dawhthlak a ni mai a, nula leh tlangval carol thawm hriattur hmun thenkhatah a awm bawk thin. Urlawk zan chu a pui a pang tan Christmas nghahna inah tlaivara zaikhawm a ni deuh ber. Chutiangin Kumthar zan pawh a ni.

Tunlai hian Christmas a lo thlen dawn hnaiha thil lar tak pakhat chu Advance Christmas hi a ni. Hemi awmzia hi thawkkhat lai khan tualchhung chanchinbuah mi thenkhatin an inhrilhfiah chhawk a, an ngaihdan pawh a in ang vek lo. A engapawh chu ni sela kan hman dan tlangpuiah hi chuan Christmas kan urlawk a ni ber awm e. Sorkar Department tam zawka thawkte pawhin Advance Christmas hi khel lovin an hmang ta a, kohhran huang chhungah pawh Thalai leh Naupang te pawhin an hmang ta zel a, chutiangin pawl hrang hrang te pawhin an hmang bawk a. Office pakhata thawk ho, School lut ho leh hnathawk ho te’n kum tawpa inthlahna hun an hman thin fare well programme pawh kha Advance Christmas hian a lan zo ta a ni ber mai awm e.Tunhma deuha kan hriat ngaih hau loh leh tih ngai loh Advance Christmas hman hi Christmas vuakvetah chuan kan thil chin lar ber ni ti ila a dik awm e.

Advance Christmas chungchangah hian ngaihtuah tur a awm T nual a, kan chhut chiang kher lo mai thei a ni. Hnathawh leh eizawnna thil emaw thil dang engemaw vanga hmun pakhata awm cheng ho emaw, thawk ho emaw te’n Christmas hmang tura an haw darh hmain a huhovin Christmas puala intiihhlimna an hmang thin a, chu chu Advance Christmas an vuah ta mai a ni. Hetianga khawvel hmundanga mite tih dan hi keini pawhin uar takin kan zawm ve a ni. Thil tha tak pawh a niin a lang. Amaherawhchu a huhova Christmas hmang leh tur tho, kohhran pakhat huang chhunga thalai leh Naupang te’n Advance Christmas an hmang fo ta mai hi ngaihtuah chian a tha ta khawp mai. A huhova hmanna programme kan duh tawk lo nge, hmun danga Advance Christmas an hman chhan lam hi kan ngaihtuah lo. Advance Christmas hi kan la ching chho zel dawn a ni mai thei, Christmas Ni tak aiin Advance Christmas atan thalai leh naupang tam tak chuan rilru an pe zawk tawh mai thei a ni. Christmas urlawkna chikhat-ah kan pawm thei a, kan hrethiam zel dawn em tih hi, a bik takin kohhran huang chhung bik thilah chuan ngaihtuah a tha viau a ni. Christmas lawmnaa kan pawm tel thei vek chuan a fel thei mai a, a hran a hraia thalai leh naupang lam hruaitu te’n ngaihtuah lovin Kohhranin Christmas lawm dan tur programme a duanah telh law law mai se. Advance Christmas hi Christmas lawmna chikhata kan dahngheh rual rualin Advance Christmas tih hrim hrim pawh hi CHRISTMAS URLAWK emaw URLAWK emaw tia kan thlak theih chuan a la inhmeh leh zual ang. Advance Christmas hmanga inngai tam tak chuan Pre-Christmas an hmang a ni mah zawk. Pre-christmas chu Mizotawngin CHRISTMAS URLAWK kan ti thei a ni. A tulna hmunah chuan Advance Christmas pawh kan la hmang chhunzawm ang, amaherawhchu a hun leh a hmun a zira Christmas lawmna programme hrang hrang te hi thliar thiam thei ila hmasawnna zel a ni dawn a ni. Thangthar te dik taka kaihruai tur hian Kohhran te’n mawh an phur sang zual a, Christmas lawm dan chungchangah paawh Thalaite leh Naupang zawkte huapa hun ruahman an thiam pawh a tul deuh deuh dawn a ni.

CHRISTMAS LAIIN FATE VENHIM A TUL

2010-12-05T09:04:00.002+05:30

Krismas laia sualna lar zual te chu hmeichhiat mipat hmansualna, Ruihtheihthil hman sualna, Rukruk, inbum leh insualbuaina te a ni.

Khawpuiah chuan Taxi Driver te hian hmeichhiat mipat hmansualna hluarzia hi an hrechiang em em a ni. An hriat leh hmuh zawng zawng hi an sawi duh lo zawk a ni. Hmeichhiat mipat hmanasualna chungchangah hian mipa aiin hmeichhia an huangtau zawk hle niin Aizawl khawpuiah hi chuan a lang. Hmeichhia, kum 12 atanga kum 16 inkar, In lamah chuan naupang ang maia nu leh pa ten an ngaih, zan lam-ah erawh chuan an hriat ngai hauhloh kawp mai thei, sex hman engahmaha ngai lo, hmeichhiat thianghlimna hlut miah lo, KS anga chhiar theih si loh nun uluk lo Taxi pute’n an tawng chamchi a ni. Chutiangin High School leh Higher Secondary School naupang hmeichhe zingah, school chawlh ni pawha nu leh pate buma Uniform nena chhuak, an thian mipa te nena tha lo tak hun hmang, tlaia school bang anga hawng leh sawi turte pawh an awm. Heng ho Krismas hman duh dan tur a hi a ngaihtuahawm hle a ni. Khawpuiah chuan khawlaia tleirawl zana vak tamtak chu hmeichhia an ni. Heta tang hian hmeichhiat mipat hmansualna kawngah hmeichhe tleirawlte inhnamhnawihna sanzia a chhut theih mai awm e. A tlangpui thuin heng hmeichhe tleirawl vakvel te hian ruihtheihthil engpawh an khawih hnial lo a ni.Tun hnaia Grape wine-Zawlaidi pawh hi Aizawlah chuan hmeichhe tleirawl hoin an lei nasa a, school uniform nena lei pawh an hreh lo.

Ruihtheihthil hi krismas lain a hluar kumtina, Zu leh ruihtheihthil khawih ngai lo te pawhin Krismas leh kumthar vuakvet atang hian an khawih tan fo nia ngaih a ni. Ruihtheih thil hluar rah chu insualbuai te, accident-te, rukruk leh sex hman khawlohte a ni mai. Rukruk phei chu Krismas dawn bazaar atangin a hluar thin a ni.

Heng sualna hrang hrang titlemtur leh tiziaawm tur hian sorkar, tlawmngaipawl hrang hrang leh kohhran atanga hmalakna te chu kan inngahna a ni leh tawp mai dawn em ni ? Kumin hi chuan thil thar deuh zir chhuah a hun tawh hle mai.

Mi thil chikmi te’n Krismas leh kumthar vuakveta sualna hrang hrang hluar titlem tura an sawi rik fo chu chhungkaw tinin hun tam zawk hman ho a ni. Kan society-ah chuan mipuiin a huhova thil tih kan ngah a, Krismas lenkhawm, ruai theh leh inkhawmte a ni. Heng thilahte hian chhungkaw member kan inthurual vek thei lova, mahni seh seh mualhranah kan tia, nu leh paten kan fate kan Ar ngam chhauh mai thin. Heng ho hi khawlaia vak tam tak chu an ni. Krismas lenkhawm leh tihkhawm hrim hrim sawiselna lam nilovin, Biak In lamah a ni emaw, lenkhawmna lamah a ni emaw, mahni In lamah a ni emaw Krismas leh kumthar vuakvet hi chuan a tam thei angbera Chhungkuaa kim taka awm ho zel dan ngaihtuah hi a ni mai. Sex hmansual a ni emaw, ruihtheihthil leh thil thalo dangte pawh hi hun kian miah lo turin Nu leh Pa ten kan fate tan ruahmanna kan siam chuan kan fate kan venghim thei ang. Chutiang theuha kan tih chuan sualna hluar fo hi a tlem ngei ngei ang.

Krismas leh kumhtar vuakvet chhung hian nu leh pa tam tak chuan kan fate kan ngaihsak hman lova, mahni lawmzawng leh hlimna kan um sana, tleirawl tamtak sual khurah an tluk phah a ni. Tunlai tualzal nun, hmeichhiat mipat hman sual pawisaklohna leh ruihtheihthil ngaihzamna karah hian Nu leh Pa kan thanharh a hun tak meuh a, khawtlang hruaitute kutah innghat mai lovin, Krismas laia mahni chhungkua vawng fel tur leh faimkhur turin inbuatsaih thar ila, a bik takin tleirawl awmna chhungkua phei chuan ruahmanna him tak neih lawk a tha khawp mai. Ar kan khawm, ineterek, picnic te leh nu leh pate hmuhphak lova programme siam hrim hrim hi tunlai tleirawl tan a him hauh lo. Nula leh tlangval puitling pawhin hetiang hun hi an duh bak an kal phah fona hun leh hmun a nih avangin, tleirawl zawk, rilru la puitling lo tan phei chuan him lo tak a ni. Pumpelh theih a tha ber. Intih tunlai duhvanga kan ngaihhnathiamna te, rualawta siam kan hlauhna te hian kan fate hi dinhmun derthawngah kan dah mek a, thenkhat phei chuan an damchhung atan an nun an ti chhe mek ni.

Chuvangin kumin Krismas leh kumthar vuakvet-ah hi chuan tihdan tharin, mahni intheihnghilhin Lalpa laka kan rochan kan fate sualna laka veng turin ruahmanna I han siam dawn the ang. A tam thei angberin chhungkuain hun tha leh hlimawm hman ho tum ila, mimal tumahin inchhungkhur pela teirawlai theihna programme siam lo turin hma la ila, heiang hi chhungkaw tam zawkin kan ti thei a nih chuan Krismas leh leh kumthar boruak a danglam ngei ngei anga, chhungkaw tin kan hlim tlang thei ang.

CWG & MIZO INCHEINA

2010-10-15T19:41:00.002+05:30

Tun tuma Common Wealth Games-a kan ram contingent-te hmahruaitu tur, nula hmeltha leh pian nalh thlan chhuah inthuam nan costume designer, Anna Singh chuan uluk takin incheina hrang hrang a dap a, puanchei, kawrchei leh vakiria te chuan a mit a la ta ber tih a sawi a ni. Kawng hrang hranga Mizo incheina te kan hmuh leh phak tawk tawka zahpui lova kan lo pho lan thin chuan rah duhawm tak a chhuah ta a ni kan ti thei ang. Chutiangin Cheraw leh kan lâm dang te pawh, Chahpcharkut-ah khawvel hmuhah kan lo pho lang thin a, Cheraw world record hial siam nan te pawh kan lo hmang ta a, chu chuan kan hnam leh culture te hi khawvel zau zawkah a pho lang ta zel a ni. Khawvelin min hmelhriatna leh min hlutna ber chu midang tih dan kan zir ve te aţang ni lovin, Mizo kan nihna ngei thil a ni zel dawn a ni. Kan ramah hnam bing incheina hrang hrang sawi sen loh kan neih lain Mizo incheina chuan kan ram ai a awh ta a, hei vang hian Mizo hrim hrim leh kan incheina chuan mite thinlungah thuk zawkin hmun a chang tawh dawn a, chu chuan tangkaina tam tak a la neizui thei dawn a ni.

Times of India-in an han ti sual khauh mai a, nimahsela kan ram hruai tu ten rang takin hma lakna chang an hria a, a lawmawm hle a ni. Kan incheina mawi tak kha khawvel hriatah hnamdang ta angina a intuh nghet pal hang tih kha thil hlauhawm tak a ni. Times of India-in a tihdikna a siam leh tawh a, leh lamah chuan a lar phah lehling ta phian awm e.

Engpawh nisela, tun tum Common Wealth Games-ah hian Mizo ten Medal la sesu lo mah ila, a hlawhtlinna tur atan Mizo hnam ziarang-in chanvo pawimawh tak a luah avangin Mizote tan hmasawnna chhuanawm tak a ni a, India ram timawia tihmingtha turin kan rama hnam pawimawh berte zingah kan tel kan ti thei ang.

DOCTOR RAWNNA MAN

2010-10-15T19:34:00.001+05:30

Sorkar hnathawk thenkhat chuan quarter an luah a, quarter luah man chu an hlawhah atangin sorkarin a hui thensak an ni. Chuvangin sorkar hnathawk quarter luah zawng zawng chu sorkin a hriatpui vek a, an hlawhah luahman a ‘cut’ vek a ni. Hetianga mi tam zawk te chunga mumal taka sorkar hian dan a kenkawh theih chuan mi tlemte a Doctorte chunga hian non practicing allowance chugchangah hian Dan mumal takin kalpui ngei sela a duhawm hle a ni.
Sorkar Doctor thenkhatte hi chu Damdawi In lamah kan khawpkham lova, mipui lam zawk hian private clinic hawng se kan ti nghe nghe ni a, chuvangin thenkat hi chuan mipuite mamawhna vang zawkin clinic an hawng pawh ti ila a sual kher lovang. Amaherawhchu Sorkar rawih Doctor te zingah private clinic hawng duh lem lo thahnem tak an awm ngei ang tih a rin theih a, heng mite tan hian non practicing allowance chu a tul hle dawn a ni. Chu chu thil awmthei a nih avangin Doctor te zingah duh thlan tir sela, sorkar hian chawk rual mai lovin an duhdanin allowance pe-in pe lo mai sela, Dan kenkawhna kawngah pawh mipui mit mim hauh lovin sorkar hian a kalpui theiin a rinawm.
Sorkar Doctor-te'n private clinic an hawng hi mipui mamawhna aţang chuan a tangkai em em zawk a; amaherawhchu non practicing allowance la chunga clinic hawn erawh chu Dan bawhchhiatna mai a ni lova, hlemhletna rawng a kai a, mipui mit a ti mim a, inentirna man pung thawm pawh hian sawi a hlawh phah niin a lang. In entirna man thar an siam pawh hi tak tak a nih chuan a sang lutuk em ? Tunge a âwm tawk bituk thei awm ? Tunge a rate hi thunun dawn ? Hun engemaw chen atang tawh khan he thil hian sawi a hlawh thin a, hmasawnna mumal tak emaw mipui thawidam zawngin emawa chinfel tun thleng hian a la ni lova, tuna mipui ngaihven an hlawh thar leh takah hi chuan sorkar hian mipuite rilru thawidam thei zawng leh Dan atanga thlir pawha dik leh felfai tak kalpui turin huai takin hma la ngei sela a duhawm hle a ni.

ZAWLAIDI MIZOTE INZIRNA ?

2010-09-19T20:21:00.002+05:30

Grape Zu, Zawlaidi hian Mizo mipuite hi Zu chungchanga kan ngaih dan engemawti zawng takin min kawih her sak hret hret dawn niin a lang a, chu chu thil tha zawk pawh a ni mai thei. Tunah a that zawk leh zawk loh sawi lawk thei lo mah ila, kan la tawn ngai loh ramah min hnuh luh tho tho dawn avangin kan inzir hret hret a ngai dawn tih a lang reng mai. Hnahlan leh Champhai chhehvela Grape chingtu te leh Winery-a innghat chhungkaw tam tak chu mahni khawtlang leh kohhrana a kul a taia inhmang, mi tangkai leh hruaitu pawimawh tak tak an ni a, an ni ho zingah chuan an khawtlangah leh kohhranah Grape Zu hian harsatna a thlen lem lo a ni ngei anga, chu chu Mizoram hmun danga mite tana zirlai a tling mai thei.
Zawlaidi hi hnung lamah a kir pui theih tawh lova, boruak thar engemaw chu min hip tir dawn ta a, buana hmain a thenin kan kherh chu a ni ber a, a pawimawh ber chu atangkai thei ang bera hmang thiam tura inzirtir a ni. Sacrament-ah hmang tangkai ila, khawvel hmun danga chaw zinga an chiar tel ang hian hman zir bawk ila, chutiangin phai chhuak theitui kan hmanna tam tak aiah hian hman tangkai tum bawk ila, dik lo taka hmangtute chuan dan anga hrem pumpelh hauh lo sela, tichuan Zawlaidi hian ngaihdan thar tha tak min siam sak thei ang.

AIZAWL TRAFFIC DISTRICT DANG TAN ZIRLAIBU

2010-09-05T08:02:00.003+05:30

Aizawl khawpui chhunga lirthei tawt buaipui hian Traffic Police leh Tansport Deptt te hun rei tak chhung an buai tawh a, traffic tawt tiziaawm turin kawng hrnag hrang an dap a, khawpui chhunga motor kal dan te, dahna hmun leh dah phal lohna hmunte thlengin vawi duai lo an ennawn tawh a, mipui ngaihdan te pawh an la hial a, Taxi phei chu tun thleng hian an la intlan chhawk zui ta a ni. Nitin motor a pung zel a, ruahmanna te pawh chu kan khawp kham lo ta zel a, chuvangin kawng thar dap a ngai zel a, hriat theih danin thla hlui, August chhung ringawt khan khan motor thar 628 ziaklutin, chawhrualin nitin motor thar 24 vel ziahluh thar a ni a. Heti zat vel tho hi kumin chhung hian thla tin motor thar ziah luh a awm a ni.
Khawpuia motor tawt lutuk tihziaawm nan leh lirthei te pawh a him zawk nan The Mizoram Motor Vehicle (Amendment) Rules, 1995 dan thar chu ruahman lawk angin nimin piah mai atang khan hman a ni a, Mizoram Gazette-ah pawh August ni 13 khan chhuah a ni.. Transport Department Secretary chuan Dan hnuaiah hian, motor registration ti thar tur reng rengin a dahna (garage) an neih ngei a ngaih thu leh, he Dan hi khauh taka kalpui an tum thu a sawi a ni.
Khawpuia traffic tawt lutuk leh lirthei him zawkna tura sorkar hmalakna hi mipuiin kan thlawp viau zel niin a lang a, chuvangin Veng hrang hranga motor nei thar te’n a dahna hmun an neih leh neih loh endikna kawngah pawh hian VC emaw tlawmngaipawl rintlak deuh thawhpui dan Transport Department hian dap chhin sela thil ta tak a nih a rinawm. Inspector emaw site inspection titute rinawm a ngai hle dawn a, dik leh huaisen taka an kalpui loh chuan a hming mai maia tih a ni leh thuai lovang kan ti thei lo. Chuvangin motor nei thar ten an dahna tur hmun leh Veng khawtlang hruaitute hriatpuina lehkha la sela, chutiang chuan an tizui ta em tih pawh a Veng neitute’n an hre zui thei dawn a, an Veng chhung-ah hrim hrim pawh kawng dal leh mipui tana hnawkin an dah em tih pawh an enzui thei dawn a ni.
Aizawl khawpui-in traffic a buaipui dan hi District khawpui dang te’n ZIRLAIBU atan hmang sela, nakin hnua harsatna thleng thei pumpelh turin District khawpui dangte tan chuan ruahmanna tam tak a la siam theih niin a lang. Inhmun pek chungchang te, insak dan te leh kawngpui zim lai tih zau hna te chu a tlai hmaa tih a ngai a, Aizawl khawpuiah hi chuan tihngaihna a awm tawh vak lova, taxi intlan chhawk zawhah hi chuan mimal motor intlan chhawk te pawh a la ngai zel anga, chutah ‘no vehicle zone’ te pawh a la awm dawn niin a lang. Rope Way te pawh kan la nei dawn a, nimahsela Aizawl khawpuia motor pun chak dan leh mihring pun chak dan atang hi chuan traffic tiziaawm tura ruahmanna te hi chuan kawngro a su tam teh chiam lo mai thei a ni.
Kan ram khawpui dangte ngaihtuah chuan Aizawl khawpui hi a te chai chai hle a, Kolkatta Veng kilkhat pawh a tiat lova, chutah chuan kan inhnawh tawt ve em em mai a, hei hian khawpui tan ruahmanna leh inenkawlna kan nei tha tawk lo tih a ti chiang em em a ni. Chuvangin a tlai hmain District khawpui dangte hian hma an lak a ngai a, thenkhatah chuan a tlai tan ve mek tawh mai thei a ni.

KUM TINA CHHIATNA THLENG THIN TE HI

2010-08-17T07:35:00.003+05:30

Tunlai hian ruahsur leh thli avangin chhiatna a thleng nasa hle a, Aizawl leh chhehvel-ah ringawt pawh leimin avangin chhungkaw tam takin harsatna an tawk a, nunna hial chan phah an awm a, hliam tuar enge maw zat an awm bawk a ni. Ruah leh tui lian avanga chhiatna thleng hian ziaawm lam a pan tawh turah ngai ila.
Kan chhut chian chuan Mizoramah hian kumtin khel lova chhiatna thleng thin a awm a, chung zingah chuan ruahsur nasa avanga chhiatna kan tawrh thin chu a nasa pawl tak a ni. Ruah sur nasa avanga lei min leh saberekakhuangkaihin chenna in a ti chhia a, mihring nunna a la fo bawk. Lei minin kawng a hnawh ping a, inkalpawhna a buai avangin harsatna tam tak a thleng a, thingtlang hmun kilkhawr zawkah phei chuan kawng diak leh nal avang ringawt pawhin supply leh nitin chakkhai lam a buai thin a ni. Rial tla leh thlipui avangin chhungkaw engemawzat chuan harsatna an tawk kumtin bawk a ni.
Fûr ruah avanga harsatna kan tawh mek lai hian ţhâl laia khaw ro luattuk vanga harsatna kan tawh te kha kan theihnghilh leh tawh a ni mai thei. Ram tam tak a kang a, tam takin huan leh lo an chân a, kâng mei avanga nunna chânta pawh an awm nual a nih kha.
Heibakah hian Aizawl khawpui dai hnaia thalai rual Blanket su tui tlain an che sual kumtin ta mai bawk a, chutiangin LAD Picnic spot- ITI Veng ah naupang tla hlum an awm fo bawk a, motor leh bike chesual avanga nunna chan an pung tual tul emaw tih mai tur a ni a, Aizawl khawpuiah phei chuan Rangvamual kawngah lirthei chesual a tam bik nghe nghe a ni.
Kopang chhak lam lung lum leh tla avanga vanduaina kan tawh thin te, kan tuidawn te, tuihawk luankawr te leh kan insakna hmun te kan uluk lova, tuihawk kawngbo a tam em em a, tuihawk luankawr tha tak siamna lam aiin incheina leh invuakvulna lam kan ngaihtuah chak a, mahni chenna in ngei ngei pawh thenkhat hi chuan kan venghim tawk lo ve hrim hrim a ni.
Insakna hmun tur kan fimkhur lova, min mai thei te, lung lum leh tla thei laka him tawk lovah te kan sa bawk a, sorkar lama thuneitute lahin mipui himna tur atana dai theuna kawngah Dan an lek kawh khauh tawk bawk si lova, Aizawl khawpui leh District khawpui dangah te pawh hmun him lo tak takah chenna in an sa a ni. A satute thiam loh anih rualin sorkar lama a mawhphurtu Department pawh an demawm tho mai.
Kangmei chhuah chhan pawh a tam zawk chu fimkhur loh vang a nih a rinawm. Ram kang thenkhat chu tute kut hlei thil tih emaw a ni fo ang. Inkang tam taka electrict kal sual kan puh thin hi Power & Electricity lam chuan a nih vek an ring lo a ni. Fimkhur tawk loh thup mawina hmanruaah an hmang a ni thei.
Rangvamual kawnga lirthei chesual tam chhan hi rui chunga motor khalh an tam vang nge, kawng a thaa an tlan chak vang tih te, a kawng siam danin a zir lo nge ni zawk ? hei pawh hi zirchian a tha khawp mai. Nakumah helaia accident ti tlem tur hian tuin nge hma la dawn ?, Kan nih nih kan nihpui reng mai ang tih a rinawm rum rum a ni. Mobile handset nei kan tam hle mai. Lirthei khalh chunga hand set hmang accident palh sawi tur an awm ta zauh zauh bawk. Two wheeler accident-ah helmet khum dân diktaka khum lo, nunna chân phah sawi tur an awm reng bawk a ni.
Heng chhiatna leh accident thleng thinte hi pumpelh turin hma a lak theih a ni. A tam zawk chu mipuite zirtir uar tur thil a ni anga, a thente erawh chu Sorkar mawhphurhna te pawh a ni ang. Chuvangin chhiatna leh accident kum tina khel lova kan tawh thin te hi, a nih nih a lo thleng leh thin tura dah lovin, pumpelh emaw, a ti tlem turin emawa hma kan lak lova, kan Sepui ruah do leh ngawt mai thin chuan, Mizoram pawn lam atanga min lo thlithlai rengtute nuih kan ti za mai dawn a ni.

NAUPANGTE LAKA HURSUALNA

2010-08-06T14:49:00.001+05:30

Hursualna kawnga naupangte tawrhna chungchang hian reh lam aiin zualo lam a pan tae maw tih mai tur a ni a, Social Welfare Department-in zirchianna, Research a ti zo hlawt a, He research hian kum 2003 leh 2009 inkara chhung a huam a, hemi chhung hian hmeichhe naupang pawngsual report an dawn zat chu CID atangin case 248, district police-te atangin 240, Child Welfare Committee atangin 124 leh MHIP atangin 18 a ni.
Kum 2007 khan Tlâwmngai pâwl pakhatin naupang pâwngsual chungchânga zirchianna an neihah chuan ram pumah hetiang lam case nei hnember pahnihna kan ni a, hemi kuma zirchianna hi sorkar hriatpuia tih a ni chiah lo na a, Mizoram dinhmun erawhchu thui tak a hril tho a ni.
CID record-a a lan dan chuan kum 2005 atanga 2009 chhunga case lut zawng zawng 12 chu mipa naupang pawngsual/khuakhem thubuai niin, police-a naupang pawngsual thubuai ziahluh zawng zawng atanga chhutin za zelah 5.46 a ni. Pawngsualtu-a puhte dinhmun pawh zirchian a ni a, District police record-ah chuan hmeichhe naupang pawngsuala puh mi 252 zingah hnamdang 31 an tel a ni.
Vantlang ngaihdan pawh lak tel a ni a, Pawngsualtuten an phu tawk hremna tuar lo nia ngaihdan nei mi zaa 70 chuang an awm a, a chhan an tarlan zingah dan rorelna kalphung (judicial system) a tha tawk lo ti mi zaa 77 an awm a, mipuiten dan kengkawhtute leh court-a roreltute an pui that tawk loh vang leh kristian nih avanga inngaihdam tawn vanga a nih thu pawh tarlan a ni. Pawngsualtuten an pawngsual chhan an sawi zingah a chhan tam ber chu Zu ruih vang a ni a, a dawt tu chu hmeichhia te’n an zir bik loh vang a ni.
Mizo society hi kan chenpui hnamdangte aiin kan zalên a, inlên pawha chêng ho kan ni a, a hlimawm rual rualin kawng ţhenkhatah kan chhiatpui ve mêk bawk a ni tih kan hriat a ţha. Kan zinga hnamdang lo awm vet e hian min hman thiampui lova, chu chu naupangin an tuar ta bawk niin a ngaih theih a ni. Kan innêlna leh ţhenawm khawvênna ti chhe chuang lovin naupangte himna tur kawng kan dap a ţûl ta a, khawsak phung lo dang chho mêkah naupangte tualchai dan pawh kan her danglam a pawimawh a ni. Tunah chuan kan inchhûngah hmun ţha leh him zâwk an mamawh tih hi pawm a hun, nitina an hun hman kan hriatpui loh chuan sualna chi hrang hrang lakah an him lo hle a ni.
Fate himna tur atan nu leh pa te’n mawhphurhna kan nei tih pawh ngai pawimawh hauh lova khawsa an tam ta mai. Mahni fa tlanbo san leh hralh ta mai te pawh an awm a ni awm e. Nupa inţhen tam lutuk te, fa chuang tam lutuk te hi naupang tam tak him lohna chhan a nih avangin, hetiang thil tha lo ti tlem tura uar zawka hma kan lâk sauh sauh a ngai a ni.

BANK A THAWK TE DAWR AN NUAM EM ?

2010-07-20T18:57:00.001+05:30

Mizoram sorkara Finance department leh Reserve Bank of India (RBI) hnuaia Department of Non-Banking Supervision-te chuan Thawhlehni kalta khan I&PR Conference Hall-ah bank ni lo, sum pûkna chi hrang hrangte khuahkhirh dan tur zirna an buatsaih a; Chief Secretary Pu Van Hela Pachuau chuan, Mizoramah company suak 21 an la awm thu a sawi a, hmun ualau tak, a bikin Aizawla Zarkawt velah an inbun deuh vek thu a sawi a; chu'ng company neitu tam zawkte chu Mizoram páwn atanga lo kal an nih thu leh, Mizoram chhunga hna an thawhna turin Mizote'n an puih nasat thu a tarlang a, kan fimkhur loh leh kan duhâm luat avang hian dâwt hmangin awlsam takin min bum thin tih a sawi a ni. Company lemte vangin Mizoram chhunga bank-te pawhin harsatna an tawh phah thu leh, chak lehzuala hma lâk a tul thu a sawi bawk.
Hemi chungchangah hian Bank pangngai te hian tih tur an nei. Mipui hamthatna tura scheme leh programme an puangzar chak tawk lova, mamawhtu tam takin thil an hriat tawk loh avangin Bank suak leh Company suak nia kan sawi te hi an bêl ve bawk a ni. Bank a thawk ho te pawh hian mipui an dawngsawng ţha tawk em tih leh Bank-a counter tina thawkte hi mipui tan dawr fo an chakawm em tih pawh hi chhut ve a ngai a, Bank suakin Bank pangngai te tana harsatna a thlen mek lai hian Bank pangngaia thawkte hian an mahni dawrtu, mipuite tan tanpuitu leh kaihruaitu tha an ni em tih pawh hi an inenfiah ve a ngai tho mai. Thawk khat lai khan Bank thenkhata thawktute dawr an hrehawm thin tih hi a ri ring hle a, sorkar Department thenkhat nen ţang kawpa loan pek chhuah tur chungchangah pawh thawhhona a tha tawk lo tih thawm hriat tur pawh a awmţhin a ni.
Bank-a account hawn te, pawisa dah te, lak chhuah leh loan lak chungchangah Bank lamin dik tak leh tha taka tih an duh thin a, chu chu mipui lam pawhin kan tlin ve pawh a ngai a, chutih rual erawh chuan thingtlang mi, lehkha thiam lo leh mimawl zawk te pawhin Bank an dawr a ngai fova, Bank-ah hian tih neuh neuh tur a awm a, saptawng leh Hindi tawnga ziak form hman a lo ni lo thei bawk si lova, chungtiang ti thiam lo te kaihruaia tanpui tur chuan Banka thawk te’n rilru zau tak pu chunga an dawn sawn a ngai a ni. Nikum maia sorkar sum lapse chungchangah pawh khan mi thenkhat chuan Bank hotute’n hriatthiamna nei thu deuh hlek sela chuan, harsatna tam tak kha pumpelh theih a nih an ring a ni.
Chuvangin Bank pangngai te hian an mahni chauh dawr tura mipui an beisei chuan mipuite tana thawhpui nuam leh tlukluhna tlak an nih ve ngei chu a ngai a, loh theih lohva dawr an ngaihna tam tak a awm mek a, chungah te chuan thawhpui an nuam em tih pawh an inenfiah a tul khawp mai.

SA ZAWRHNA THIANGHLIM

2010-07-03T21:46:00.002+05:30

Mizorama chhunga kum khata sa talh zat hi Tonn Sing1, Sang2, 480 vel nia chhut a ni a, nitina sa kan eiral dan chu : Ar - 2,266, Vawk - 226, Kel - 23, Bawng - 52 a ni a, Lawi leh Sial te erawh chu nitin 1 kan talh ziah lo deuh a chhut a ni. Hemi chhut chhuak tur hian ran pakhat rih zawng tur chawk ruala tih a ni. Mizoram pumah kartin Vawk 400 atanga 500 leh Bawng 250 atanga 300 talh ziah ang a ni a, AH&Vety Deptt. chhut dan chuan Mizoram puma sa mamawh zat hi kumtin cheng vaibelchhe 180 man hu vel a ni a, Aizawl khawpuiin kum khat chhunga kan sa eiral zat chu cheng vaibelchhe 61 man hu a ni.
Heti taka Sa chi hrang hrang kan eiral lai hian a zawrh dan hi a changkang lo em em a ni. Tegnology lama kan than nasat dan thlir phei chuan kan hmasawnna a inbuk tawk lo lutuk a, a nuihzat thlak mah zawk a ni. Aizawl khawpui bik kan thlir chuan Mobile phone chang kang tak tak hmang chungin kawngsir tualchara vawksa sat kan kil tuau tuau mai a, Inrinni tuk a lo ni a, motor changkang tak takin vawk rawh sa, a hriselin a thianghlim tha tawk em tih pawh hriat loh Bazar Sa zawhnaah kan phur lut zut zut a, chu chu Tho bawm mai theiha dahin Sazuar hovin an sat darh ta a, thoin an bawm zui reng a, Sa zuar te pawhin, eitur zuar e ti lo chuan, an thawmhnaw fai tha tha dah bovin, Sa-sah kawr, engtia rei nge an suk tawh loh tih pawh hriat loh chu an ha chhuak lawi a, an sa sah chu thawmhnaw man to leh chang kang tak tak inbel chungin kan lei leh zung zung mai bawk a ni. Hei hi kan mikhual hnamdangte mitah a langsar em em a, hnamdang thinlunga Mizo min pawt hniamtu pakhat a tling a ni. Aizawl State Guest House kawng peng tualchara Inrinni tuka vawksa an han sat leh mai thin te hi, kan Guest House changkang bera thleng hnamdangte tan chuan thill mak tak a tling a ni.
Hetiang hi kan dinhmun a nih lain Mizoram Sorkar hnuaia AH & Vety. Department chuan Aizawl khawpui Veng hrang hranga hmun 11-ah Sa thianghlim zawrhna, Modern Meat Shop an hawng thar ta a, hei hi hmasawnna pawimawh tak a ni. Kan khawpui hi Mizoram hmel lanna a nih avangin heng sa zawrhna tharte hian mimal sa dawr changkang lo tak tak hi hmasawnna kawng a kawhhmuh thei dawn ta a ni. Mipui pawhin heng Sa dawr thar hi hlut thiam ila, sa dawr pangngai aiin sa man tlemion a lo to deuh ta a nih pawhin, a thianghlimna te leh a changkanna te hriain sawi sel mai lo ila, kan lo hrisel zawk theihna tur leh hnamdang laka kan hmai bal lutuk phihfai tur hian thildanga insen kan huam ang tho hian inhuam theuh ila, mipui pawhin kan rilru heti lam hawi hian tuai thar thei ila a duhawm hle a ni.
Hetih lai hian Modern Meat Shop enkawltute hi an fimkhur a pawimawh hle dawn a, Sa supply thin-tu tur te pawh an fimkhur a pawimawh hle dawn a ni. Sorkar leh mipoui beiseina tihlawhtling turin rinawmna a pawimawh a, chu chu an kutah a innghat a, contract hnathawh rilru pua an enkawl vaih chuan hemi kawnga kan hmasawnna rahbi tuk hi a tleu chhe vek dawn a, chuvangin Mizoram hmasawnna tur thlir chunga an thawh a ngai a, sumdawnna piahah an mawhphurhna pawimawh tak hi an hriat reng a tul dawn a ni.
Hetianga Sa thianghlim zawrhna hi a hlawhtlin ngeina turin, a enkawltute leh mipui ten mawh kan phur ve ve a, Modern Meat Shop hian mipuite changkanna kawngah min kai harh ngei sela a duhawm tak meuh a ni.

INRALRINNA DAR A RI TA !

2010-06-25T07:01:00.003+05:30

Ningani kalta khan Mizoram State Aids Control Society Executive Committee chu an chairman, Pu Vanhela Pachuau, Chief Secretary hovin an thukhawm a, hetah hian Mizoram AIDS chungchanga kawng hrang hranga hma lak dan thlir hovin tuna dinhmun te pawh sawi ho a ni a, hma lak zel dan tur te pawh rel a ni. Hemi tuma Mizoram dinhmun tarlan dan chuan kumin May thla tleng khan Mizoramah HIV Positive 4,608 hmuh chhuah tawh a ni a, thla hlui May thla chhung ringawt khan HIV Positive mi 101 zet hmuh chhuah an ni. Thla kalta chhunga HIV Positive hmuh chhuah zat beh chhana kan chhut chuan kum khat chhungin a tlem berah pawh HIV Positive mi 1200 chuangin Mizoramah an pung dawn tihna a ni a, heti chung hian thisen test loh loh tam tak an awm ngei dawn tih chu a rinawm bawk a, he natna hlauhawm tak mai hi Mizorama a darh nasat zel dan tur hi ngaihthah mai chi a ni ta lova, in ralrinna dâr vuak a ngai ta a ni.
AIDS darh zau dan leh dinhmun chhut chhuak tur hian tih dan hrang hrang a awm a, Mizoram din hmun tuna kan hriat theih chu Sentinel Surveillance hmanga tih a ni a, hei hi research chi khat a ni a, naupai te, ruihlova inchiu thin te, nawhchizuar te leh Serh-hri (STI) vei te zingah thla hnih chhungin sample tuk zât awmin District tinah an thisen hi endik a ni a, chuta tang chuan HIV hluar dan chhût chhuah a ni ta a ni. Hetianga chhut hi dik thawkhat hle a ngaih a ni. Hetiang hmanga Mizoram dinhmun hi chhut chhuah a ni a, Mizoram mihring 1,000 zelah hian mi 8 hi HIV hrik kai ang kan ni a, a hniam lam aiin a sang lam a pan zawk rih a ni.
Heti taka Mizorama AIDS darh chak chungchang hian mipui bakah Kohhran leh tlawmngaipawl te hi mak tak main a nghawng na teh chiam lo, AIDS dona tura pawisa tam deuh hmuh theihna turin AIDS vei kan insawi tam mai mai a ni lo maw ? tih te hi thenkhat chuan an sawi thin. Hengte avang hian Mizoram dinhmun kan tarlan thin te hian kan rilru a hmin tawk lo pawh a ni mai thei, nimahsela, Mizoram pawn atangin National Aids Control Organisation te lo kalin, an mahnni ngeiin an rawn zir chiang thin a, kan dinhmun hi uar theih a ni lova, zep theih pawh niin a lang lo.
Sorkar hmalakna thlir mai lova mah ni theihna zawn theuha tan kan lak a hun a, sum kher hmanga AIDS do tumna rilru pawh kan paih deuh deuh a tul, pawl tana sum sum tuak tumna avanga maia sorkar-in AIDS dona programme a neihte kan lo thawhpui thinte pawh hi inen fiah a hun ta, tunah chuan mahni theihna kawng kawnga tan lak a hun tawh a ni.

CADS

2010-06-16T21:49:00.002+05:30

Mizoram Assembly Session neih zawhtakah khan Governor Excise & Narcotics department-in nikum April a tanga kumin January khan ruihhlo avangin mi 382 leh ruihhlo ti thin mi 2,653 man an ni tih a tarlang a, chuti a nih chuan ruihhlo zuar nitin mi 1, a chang chuan a aia tam man ziah ang a ni.
Excise & Narcotics Department CHUAN sorkar kum kal ta chhung heroin gram 903 leh miligram 350, ganja kg 210 leh gram 657, Ephedrine kg 1 leh gram 72, Nitrazepam tablet 2,579 leh a chanve, Alprazolam tablet 50, khuh damdawi bur 64, spasmo proxyvon mum Sing6, Sang 5, 923 leh parvon spas mum Nuai 1,Sign 4 leh 143 an man bawk. Zu leh drugs kaihhnawih thilah mi 7,058 an man bawk a, an mi man zingah hian ram dang mi 90 an tel a ni. Kumin chhung mai pawh hian tam tak an man leh tawh a ni.Kum hnih mai kalta chhung khan mahni intihlum an tam em em bawk a, Ruihhlo nen inkaihhnawihna a neih ngei a rinawm.
Hetiang hi kan dinhmun a nih avangin Central YMA chuan tun hnaiah ruihhlo dotu pawl, Central Anti Drugs Squad (CADS) chu thla hlui ni 29 khan a din a, Kumin atana an kum puan ‘ Khawtlang nun siam that’ tih an kalpui mek tihhlawhtlina tur a hma lakna kawng khat a ni dawn a ni. Central Anti Drugs Squad (CADS) din a nih atanga karkhat chhung maiin ruihhlo kaihhnawih thilah mi 52 an man tawh a, heng zinga mi 9 chu sokar thuneitute hnenah an pe a ni. Nitrosun mum 34, Parvon spas capsule 4460, Ganja Kg 3 vel, Heroin NO.4 Hawng 1, can 41 leh piece 59 an man hman a, kar khat chhunga an damdawi man te hi Cheng Nuai 3 man vel nia chhut a ni. Hemi hnu pawh hian engemaw zat an man leh tawh a ni. CADS-te hian Aizawl khawpui chhungah hun rei lote chhungin ruihhlo tam tham tak an man tawh a, hei hian hna an thawh thatzia a tarlan rualin, sorkar tha chakna hmang ringawta beihna hian ruihhlo tihrêm a harsat zia a tilang chiang hle. Chubakah Excise Deptt indaih loh thu hi a lian hle a ni.
CADS hmalakna avang hian Aizawl khawpuia drugs zuar leh a ngawlvei zalen lutuk te chu an vang leh tan tawh a, Central YMA hruaitute sawi danin Drugs hrang hrang man pawh a sang chho leh tan tawh a ni. Ruihhlo do a pawimawhzia kan hriat rualin a hautak dan pawhkan hriat tel a ngai a, Central YMA pawh hian mipui beiseina tihlawhtling turin hma an la leh a ni tih an puang a, CYMA hian theihtawp tak meuh meuhin ruihhlo hi a do tawh a, a thawm a nâin faktu leh sawiseltu tam tak a nei a nih kha. Tihthat tam tak karah tihfuh tawk lote pawh an nei ve bawk a, amaherawhchu YMA-in ruihhlo a dolai na na kha chuan ruihhlo a vang a, ruihhlo avanga thihna leh chhiatna dang pawh a tla hniam a ni. YMA bawkin ruihhlo an dona kawnga hma thar a han la leh ta hi thil lawmawm tak a ni.
YMA hian ruihhlo do kawngah thahnmenngaih luat vangin dai pelh a nei ve zauh zauh a, tunah chuan a thil tih tawha inzir fing chungin, rilru fim zawk nen CADS an kalpui dawn niin a lang a, ruihhlo dotu pawl tangkai tak an nih leh ngei a rinawm.

CHHIARPUI VRS 666

2010-06-07T22:56:00.001+05:30

Chhiarpui hi kum 11 dana neih a ni a, Chhiarpui hnuhnung ber chu kum 2001 khan a ni. Mizoramah tunhma zawng khan Chhiarpuiah sakhuana thil avanga harsatna kan neih hriat a ni lova, chuvangin record pawh a dik thawkhat viau turah a ngaih theih a ni. Kum 2001 chhiarpuiah khan Mizoramah mi Nuai 8, sing 9, 1058 kan awm a, un tum 2011 chhiarpuiah hian Mizoram-ah mihring nuai 11 vel an awm beisei a ni, Chhiarpui hi thawhhnih-a then a ni a, tun tum hi thawhkhatna niin April atang khan tan a ni a, September, 2010 chhunga zawh tura ruahman a ni. Thawhkhatna-ah hian eng ang In nge awm a, In engzat nge awm tih te, chu In-ah chuan eng thil te nge an neih, tui a awm tha em, electric a awm tha em tih leh thil dang tam tak an zirchiang dawn a ni. A thawhhnihna hi Nakum February thla chhunga neih a ni ang. Chutah chuan mihring zat chhiarpui tak tak neih a ni ang. 2011 chhiarpui hi India rama chhiarpui neih vawi 15-na tur a ni a, Independence hnu-ah chuan a vawi 7-na tur a ni. India ram chhiarpui hi khawvela chhiarpui hautak leh lian ber ni tura ngaih a ni bawk. Mizoram District 8-ah, Principal Census Officer (DC te) kaihhruaina-in chhiarpui hi neih a ni a, Mizoram hi Charge Officer huam 92-ah then a ni a, census enumerators 2354 leh supervisors 392 an awm a ni.
2011 chhiarpui hian Unigue Identification Number (UID) siam tum a ni a, Kum 15 chin chung lam India khua leh tui te chuan Voters ID card tiat vel ‘Smart Card’ an tih chu an nei vek anga, hetah hian hming te, veng te, nihna leh thiamna, fingerprint leh thil pawimawh dang chu a awm kim vek dawn a ni. He card hi kum tangkaina tam tak a nei dawn a ni.
He smart card tak mai hi Mizoramah chuan mi thenkhatin an hre thiam lova, sakhuana thil nen sawi zawmin Kristian inzirtirna-a Sakawlh chhinchhiahna 666 ni thei mai dawna ngai pawl an awm a, chung mite chuan chhiarpui hna kal lai mekah an tel ve duh ta lo a ni.
Bible kan en chuan sakawlh chhinchhiahna chu kut ding lamah emaw chalah emaw a ni dawn a, sakawlh hming emaw a hming namber emaw a ni ang, mihring nambar a ni a, 666 a nih tur thu kan hmu. UID emaw Smart Card emaw chu lehkha, kan thlalak leh nihna leh kan chhinchhiahna a ni mai a, chalah emaw kutah emawa bel chi a ni lo hrim hrim a, nimahsela heti chung pawh hian engemawzat chu an buai tho tho a ni.
Technology lama hmasawnna chak taka kal mek hian mi thenkhat hi chu hnunglamah a hnuttchiah thui ta deuh a, UID tih leh Smart Card han tih te pawh chu a awmzia an man pha tawh lova, chiang taka hrilhfiahna an dawn si loh an tan thil buaithlak a ni thei ang. Sakhuana thila ration card nei duh lo thenkhat chuan midang ration card an hawh thoa, a thente phei chuan raton card an siam tir leh tawh tih Aizawla Retailer hlun tak pakhat chuan a sawi a ni. Chuvangin chhiarpui neih mek chungchangah pawh hian mipui zingah a pawimawhna leh a awmzia uar deuh taka inzirtir a ngai a, tuna hre thiam lo mek te phei hi chu a bik taka hrilhfiah tura ruahmanna siam a pawimawh hle a ni

VAIHLO HMAI TIBALTU

2010-06-07T22:44:00.001+05:30

May ni 31 khan World No Tobacco Day hman a ni a, Mizoramah pawh he ni pual hian , Aizawlah chuan Chanmari YMA Hall-ah Mizoram State Tobacco Control Society bultumin hman a ni. Lungleiah chuan Lunglei Civil Hospital Hall-ah an hmang. Kumina World No Tobaco Day thupui chu ‘ Vaihlo laka hmeichhiate ven him’ tih a ni.
Mizoram State Tobacco Control Society tarlan danin, khawvel puma mei zu 20% chu hmeichhia an ni a; vaihlo siamtu company-te'n an sumdawnna tihhlâwk nan hmeichhiate an hmang nasa hle a, vaihlo fakna pawh hmeichhiate híp tur zawnga siam a ni fo a, ram 151-a hmeichhe tleirawl 7%-in meizûk an chíng a ni. National Survey 3 in nikum maia a tarlan dan chuan Mizoram ah hian zuk leh hmuam laka fihlim lo mipa zaa 83 an ni a, hmeichhe zaa 60 an ni.
Meizial zuk leh sahdah hmuam hi hnam mâwl zîngah ‘addict’ ngawl vei an tam nia chhut a ni a, inthlahdah leh nun zalen lutuk zingah a hluar bik a ni. Mi thiamte ngaih dân chuan hnam mâwl a piangah mei zu an tam a, chungzingah chuan hmeichhia, ţhalai leh naupang meizial zu an tam duh bik nghe nghe an ti a ni. Kawng tam takah Mizote hi changkâng ve hlea kan inhriat laiin, zûk leh hmuamin min chiahpiah nasat dân chhût chuan, hnam hnufual te zingah kan tel a la ngai a, kan la intodelh lo kan tih kan tih laiin, zûk leh hmuamah kan phu lovin sum kan sêng ral si a ni.
Tunah hian mi thiamte chhût danin kan ram chhûngah Mizoram chu vaihlo hmang nasaber kan ni ta reng mai a, kan ram mai nilo, khawvel pumpuiah -ah mipui tam dan zawng atanga chhutin cancer vanga thi tamna ber kan ni a, a chhan chu Mei kan zûk nasat vanga ngaih a ni. Khawvêlah hrawk leh lei cancer-a world record siam tu kan ni mek a ni !
Hriselna leh economic a tih chhiat bâkah, zûk leh hmuam hian kan khualţha-te lakah kan hmai a tibâl hrim hrim bawk. Nula hovin Tuibûr leh Khaini an hmuam phei hi chu a hrisêl lohna chu thu hran, a ţawpna hi bânsan chhan tham a ni. Mizo zingah chuan kan hre ţhanga, ngaiah kan nei a, a mawi lohna kan hmu thiam mai lo a ni thei e, min rawn tlawhtu, mikhual te tân chuan a langsâr hle mai a, kan hmai tibâltu an tling a ni. Mizorama hmeichhiate zingah sahdah, khaini leh tuibur hmuam an tam hle a ni.
Mizoramah zuk leh hmuam kan insum kar lo lutuk vanga kan hnufumna leh hriselna kawnga kan tlakhniam phah nasat zia kan chhut chuan, zuk leh hmuam that lohzia inzirtirna lam a tlem lutuk niin a lang. Chuvangin tun aia uarzawka zuk leh hmuam that lohna zia inzirtir kan mamawh hle a ni.

ZORAMAH RUIHHLO A HLUAR LEH TAN

2010-04-16T07:43:00.003+05:30

Hmanni lawka Mizoram Assembly Session neioh zawhtakah khan Governeor Excise & Narcotics department-in nikum April a tanga kumin January khan ruihhlo avangin mi 382 leh ruihhlo ti thin mi 2,653 man an ni tih a tarlang a, chuti a nih chuan ruihhlo zuar nitin mi 1, a chang chuan a aia tam man ziah ang a ni. YMA-in ruihhlo do beihpui a thlak vangin Ruihhlo avanga thihna a tlahniam a, kawngpui kama mipui pawh zah loa ruihhlo zawrh leh hralh a tâwp a, ruihhlo tih tur a vân avangain ruihhlo ti thar pawh an tlem hman hle. Nimahsela tun hnaiah YMA lam an hahchawl tawh si a, ruihhlo chi hrang hrang, a nghei har ber nia sawi heroin-te thlengin a hluar thar leh ta a ni. Ruihhlongai te pawh Aizawl khawpui lun laiah inthalhrung hauh lovin an inhawrkhawm leh tawh a ni.Kan ram leh hnam hmelma, thalaite eichhe mektu, ruihhlo lo hluar leh mek beilet tur hian sorkarin a tihdan phung pangngaia hma a lak mai chuan awmzia a nei thu lutuk dawn lovin a lang. Kha leh chen kha police leh excise an awm tawh a, nimahsela YMA-in beihpui a thlak ngai khawpin a lo hluar chho a ni. Chuvangin tuna ruihhlo hluar chho leh mek do let tur hian sorkar hian tihdan phung pangngaia hma a lak chuan tunhma ang tho khan, engtik hunah emaw chuan tlawmngai pawl thenkhat chu hmala turin an lo zuang chhuak leh duh maiin a rinawm.Ruihhlo ngaite enkawlna tura sorkarin a ruahman ve, Sethawna mi pawh MNF kaihhruai sorkar hun lai atang tawh khan tihhlawhtlin tak tak ala awm lo. Sorkar tharah hian enge a an dawn ? Ruihhlongaite hi engtia tih zel tur nge tihte pawh hi rilru thara ngaihtuah a tul ani. Manipur sorkar chuan hun reiloteah ruihhlo ngaite khuahkhirhna tur, drug addict control policy a siam dawn. Union ministry of social justice and empowerment-in a hrilh angin an state social welfare department committee chuan he policy tur hi a duang mek a ni. Heng te pawh hi Mizoramin kan ti ve thei em ? Vannnei thlak takin nikum khan Mizoram sorkar chuan ruihhlongaite enkawltu Home hrang hrang sumfaiin a tanpui hlauh mai a, an tangkaipui hle a ni. State sorkar pawh hian sorkar laipuiin tanpuina a pek bak, home hrang hrang tanpuina hi ruahman zel dan a awm em tih pawh enfiah a pawimawh hle a ni.
Ruihhlo hluar thar mek titawp turin sorkar hian thapui a thawh a ngai a, Ruihhlo ngai enkawlna lama thawktu tha tak tak kan nei a, anni lamin an tih tur tha takin an ti zel ang a; hetihlai hian a ruihhlo hluar zel tur vên hna hi tun aia chak zawka thawh a ngai ta a ni. Tlawmngai pawlte pawhin an hna tha bul tan tawh hi tawpsan mai lo se, dan hnuaiah awmze nei taka an chhunzawm zel a tha hle. Police department-a ruihhlo vaitu bikte pawh tang lehzual se, Excise department lam pawhin hmasawn tumin thawk se, kan zavaia kan tan tlan loh chuan ruihhlo avanga thihnain kan thalaite a rûn leh ngei dawn niin a lang, chuvangin a tlai chhiat hmaa chet lak tul ani.

MIDANGTE TANA PHUR RIT

2010-03-30T01:22:00.000+05:30

Midangte tana phurrit siamna kawng tam tak a awm thei anga, thenkhat chuah tarlang ila. Khawvel thiamna sang zelah rimawi atana hmanraw changkang tak tak a lo chhuak ta a, inlamah leh motor-ah te pawh sound system tha tak tak hmangin zai leh rimawi kan ngaithla thei ta. Nimahsela midangte tana bengchheng khawpin thenkhat chuan an hmang a ni. Hetiang hmanaraw changkang hi a hman dan tawk kan zir thar a tul khawp mai. A dang leh chu Tow Wheeler thenkhatah chuan a engine ri tiring zual turin thildang an vuah a, chutiangin motor thenkhat pawh anih dan tur aia ri ring turin an khawih danglam bawk. Heng lirthei tlan thawm hi zanah phei chuan a ring zualin midang tan phurrit a tling tak zet a ni. Hetiang hi thawkkhat lai khan thuneituten an khap a, nimahsela khawuh taka kenkawhzui a nit a longe, aizawl khawpuiaih phei chuan hriattur a tam leh ta hle a ni.
Kawng zau laiah motor kan riah zel ta mai bawk a, kawng zauvin awmzia a nei thei meuh lo. Khawpui a piangah a nil eh zual. Tranasport Deptt. chuan hetianga midang tana harsatna siamte hi a tih nep dan a ngaihtuah dawn nia sawikha a ni a, a tak a thlen hun a nghahhlelhawm hle a ni.
Information Centra-a au chungchang pawh hi midangte tana phurrit tling thei a ni vet ho mai. Vantlang tana thupawimawh puan chu thil tul a ni. Nimahsela rikrum thil pawh ni lo, zan reh tawha puan fo hi pumpelh theih niin a lang a, YMA , Kohhran leh V/C information Centre hmanga kan tlangau dante pawh hi midangte tana phurrit siamlo thei angbera hman thiam a tul a ni.
Vantlang kawng nek chep zawnga khawsak te, bawlhhlawh leh tuichhe paih fimkhur loh vang bakah ranvulh anga midang tana rimchhia leh hnawk siam te hi midang tana phurrit langsar zual te an ni. Thenawm khawveng karah chuan thui tak kan lo inhrethiam pawh a ni thei e, nimahsela veng dang leh mikhual ten vantlang tana phurrit a tlinzia hi an hmu rang khawp mai. Nunphung pangngai ang maia kan neih thil thenkhat hi chu kan mikhual ten phurrit-ah an ngai tlat a ni. Heng kawngahte hian kan inenfiah a pawimawh hle a ni.
Zu zawrh leh ruih, sorkar leh khawtlangin an khap thil siam leh zawrh te hi midang tana phurrit siamna hluar tak tak te a ni awm e. Heng thil tha lo te laka inthiarfihlim tura nasa taka kan inzirtir a tul a ni.
Ruang lak pawh hi khawpuiah chuan a chintawk neih a tul ta khawp mai. KHawtlng tan, mipui tan phurrit a tling a ni. Chhiat tawh thil a ni a, intawrhpui loh thu chu a awm hauh lo. Nimahsela hmun thenkhatah chuan khawtlang tibuai lovin ruang lak a pumpelh theih a, nimahsela khawtlang kan tihbuai dan ngaihtuah lem lovin ruang kan intlawhtir fo a ni.
Mahni hmasial luat vanga midangte harsatna tawmpui pha lo kan pung tial tial a, hei hian Mizo society –ah hmun thuk tak a luah tan mek niin a lang. Midang te hlamchhiahin mahni duhzawng kan um vak a, chutiangin YMA leh kohhran huangchhung atanga khawnte sep tam lutuk te pawh hi thenkhat thenkhat tan phurrit a tling em tih te pawh hi bih chian a ngai vet ho a ni.
Kristian inzirtirnaah chuan Pathianin mitin mai hi mite dang tana malsawmna ni turin min kova. Bible-a kan hmuh danin Pathian chuan Abrahama hnenah ‘Nang malsawmna ni ang che’ a ti a ni. Midang tana phurrit nih chu sawi loh, midang tana malsawmna ni thei turin kristiante chu kan awm a tul a ni.
Khawtlang nun siam tha tura thil pawimawh tih tur tam tak zingah midang tana phurrit siam lo tura khawsak chu kan inzirtir sauh sauh a tul a ni.

CHAPCHAR KUT HMAN DAN A PAWIMAWH

2010-03-14T20:04:00.000+05:30

Mizo te hian kan hnam zia rang pholanna atana Chapchâr Kût kan hman ţhin dan chungchang-ah ngaihdan hrang hrang a awm a. Thenkhat chuan kan pi leh pu te hunlaia Chapchâr Kût an hman dan dik tak phaw chhuak thei ang bera hman an duhlaiin, Mizo hnam ziarâng leh lam hrim him pholanna hun remchanga hman duh pawl awm a ni bawk, heibak ah hian thenkhat chuan cultural exchange anga kalpuia, hnamdang te pawhin an hnam ziarâng an rawn pho lan ve theih nana hman te pawh pawi ti lovin, ram chhung hnam hrang hrang inpumkhatna atana hman thain an ring bawk a, an phalzau hle a ni.
Hnam ziarang leh kalphung hi khawvel hmasawn zelah a danglam hret hret veka, hei pawh hi ţhenkhat tan chuan hriatthiam a har a, nimahsela hun in a her chhuahpui tho tho si a; hetiang thleng pawha kan hriatthiam theihna tur atan a inzirtirna kan mamawh a ni. Mizoram chu kan vannei a, tlawmngaipawl tha tak tak kan nei a, heng te nêna ţang ho pawh hian khua leh veng tin-ah khawtlang nun danglam chho hrula culture vawnhim dan inzirtir theih a ni. Kan pi leh pute hunlaia tih ngai loh, Chapchar Kût-ah khuallian te pawh kan nei ta zel a, tumahin kan sawisêl hran lo, chutiang zêlin thil dang pawh a ţul chuan her rem hret hret a ngai thei a ni. Art and Culture Deptt hemi kawngah hian mawh an phur zual a, anni hian Kristian sakhaw ti hmêl hem lova Mizoculture vawn him theih dan an dap a ţul a, seminar leh workshop te pawh a tam thei ang buatsaihin, a ţul chuan research thlengin tih inhuam sela thil tangkai tak a ni ngei ang.
Intih changkanna vanga Mizo hnam ze hlauh zawnga khawsa an awm fo. Mizo lam leh inchei zahpui te pawh an awm a ni awm e. Mahni hnam lam leh zai dah hniama, hnam dang lam leh zai chawi vul zawk kan awm a ni mai thei, hnam dang zai leh lam pawh kan thiam chu a sual love, kan inchei danah pawh a hun leh hmun a zirin a Mizo reng thei kher lovang, a hriatthiamawm a, Mizo incheia inchei reng turin intihluih chi pawh a ni chuang love. Nimahsela kan hriat reng tur chu Khawvela Mizo te hlutna ber chu, hnam pakhat, culture leh tradition hran neia kan awm ve tlat hi a ni. Kan hnam zaį leh lâm-ah te hi chuan khawvelah a ber kan ni kum khua dawn, a neitu kan nih miau avangin. Kan hnam inchei leh lam te hi kan hnam ro hlu, khawvel hmundanga an neihve theih loh a ni, hnamdangin nei vein lo ti pawh ni sela, Mizo tih ang ti ve, Mizo tih ang zir ve an ni chauh dawn a, Mizote hi chu a tak tak, ‘original’ kan nih tlat reng dawn a, chuvangin khawvel hmuhah mawi taka kan pho lan thiam a tul deuh deuh dawn a, Chapchar Kut hi chumi atana hun remchang tak chu a ni a, tangkai taka kan hman chhoh zel a pawimawh dawn a ni.

CHAPCHARKUT 2010 AIZAWL

2010-03-12T02:56:00.005+05:30

INSAWISELNA HMAN TANGKAI THIAM A PAWIMAWH

2010-02-26T18:56:00.000+05:30

Fakna awka leh inchawimawina thawm chu hriat a nuam a ni. Politician leh politics-ah phei chuan fakna leh insawiselna hian hmun tam ber a luah ti ila a dik mai awm e. Political party dangin political party dang an infak thawm hriat tur a vang thuin hle a, sorkarna chelh tawh zingah phei chuan infak leh inchawimawi tawn sawi tur an awm meuh lo. Sorkar hnuhnung apiangin sorkar hmasa political party te kihhnawk an thian mawlh mawlh zel a ni ber mai. Ngaihdan a inan vek loh avangin kihhnawk tia sawi hi thil awm thei tak pawh niin a lang. Politician zingah mimal infak sawi tur erawh chu hriattur an awm ve bawk a, chu pawh chu a tam lem lo.Kan hriattheih lar tham hnai vai chu Congress-in sorkarna an lak hnu lawka Chief Minister Pu Lal Thanhawla’n MNF kaihhruai sorkar tla taa Assembly Speaker Pu Lalchamliana a fakna kha a ni awm e. Assembly House a kaihhruai danah Mizoram Assembly Speaker zinga tha ber nia a ngaih thu a sawi a nih kha. Party President te phei chuan mimal tak pawha beih an tawk duh bik niin a lang.
Infakna hian mi a tiphura, hmalakna kawng tam takah chakna thahruai a ni thei a ni. Amaherawhchu infakna hian mahni nihna diktak min hai tir ve thei tho mai, infakna zawng zawng a dik ziktluak fo loh avangin, infakna tam tak chuan mit a tidela, mi a hruaisual ve thei a ni.
Thil tha zawk a thlen theih beiseina avanga sawiseltu nih theih a pawimawh hle a ni. Hei hi Assembly House chhungah a takin kan hmu thin awm e. Eptu lam thutna siam a ni a, chuta thu te chuan sorkar kallai khalh ngil turin sorkar inrelbawl dan leh thil tih danah a dik lo leh fel tawk lo lai nia an hriat te an au chhuahpui thin a, dik leh fimkhur zawka kal turin sorkar an nawr thin a ni. Hei hian a tul huna sawiseltute dinhmun pawimawhzia a tilang chiang viau awm e.
Tunlai hian Mizorama opposition party te’n Ruling party sorkar kalpui dan leh hmalakna sawiselin an duhkhawplohnate an au chhuahpui hlawm a, Heng sawiselna te hi Ruling Party chuan inenfiah nan hmang hlauh sela, atangkai hle dawn a ni.
Insawiselna leh induhkhawplohna chungchangah mi thenkhat chuan insawifiah an tum fo thin. Sorkar kalphungah ngat phei chuan sorkar kal zel danah a dik chu a lo lang fiah tho tho mai a, chuvangin thusawi leh ziak hmanga insawifiah emaw ai chuan thil dik leh tha chu chetzia leh hmalakna hmanga lantir mai hi mipui-te tan hriat thiam a nuam ber a ni. Chuvangin insawiselna te hi hmang tangkai thei turin rilru zau tak pu ila kan zavaia tan hmasawnna pawimawh tak a ni ngei ang.

KHAWTLANG NUN SIAMTHAT

2010-02-08T20:48:00.001+05:30

Sumdawnna kawngah ringawt pawh Mizoram leh a leilungfate chanvo tichhe zawnga mahnia tanghma hai tlat sawi tur an awm fo mai. Hetianga neitu nihna dinhmun kengkawh thei lo hian, kawng dangah pawh khawtlang nun an ti hmelhem fo thin a ni. Home Minister sawi ang hian khawtlang nun siamtha turin phur takin pen chhuak theuh ila, tichuan Mizoram neitu kan nihna, kan dinhmun diktak khawvel hmuhah kan pho lang dawn a ni.
YMA hian kumpuan a nei nual tawh thin a, Mizoram leh a chhunga chengte pawhin hma kan sawn phah viau zel a ni. Nungcha humhalh, ruihhlo do leh zirna uar kumte khan a tha lam hawiin Mizoram hmelhmang a tidanglam a ni kan ti thei ang. Chuvangin YMA hian tihtakzeta hma a lak chuan Kumpuan dang ang bawkin Khawtlang nun siamthat tih pawh hi kan thatpui ngei a rinawm a, kan zavaia tihtak zeta chhanchhuah hna lungrual taka kan thawh chuan a hlawhtlina kan hmu ngei ang.
Hlemhletna do tura sorkar hmalakna hi mipuiin kan ngaihven zui theuhin a rinawm. Hlemhletna hi a zung chawpa phoro duh sorkar kan nei ti ila a dikawm e. Kumina YMA kumpuan kaihhruaianaah, hlemhletna, kut tling lova thil neih hnualsuat tur leh mahni tawka thawh chhuah hlut thiam tura inzirtirna a tel a, hei hi uar taka inzirtir a tul hle dawn a ni. Kut hnathawktute dawmkanna tura sorkar policy NLUP hnuaia tanpuina dawng tur zingah, tanpuina sum dik taka hmang thei lo, thildang atana hman hreh hauh lo engzatnge awm ang? Hei hi ngaihtuah tham tak a ni. Khawtlang nun siamthatna kawngah hian hlemhletna do hi a pawimawh berte zing ami a ni a, sorkar hnathawkte chauh kan tin zawn mai ang tih a hlauhawm a, tanpuina pawisa a hmanna tur diktaka hmang ta lo an awm em tih thlengin YMA chuan mahni branch chhung theuhah awlsam takin kan hre thei ang. Taimak leh rinawm inzirtirna a tan, NLUP tanpuina sem tur hi hmang hlauh mai ila thil remchang tak niin a lang.
Ram tana hnawksak ber te zinga mi chu ruihtheih thil a ni. Khawtlang nun siamtha tur chuan ruihtheihthil hi palzam mai chi a ni dawn lo tih a chiang a ni. Ruihtheihthil hian sualna dang kaihhnawih a ngah khawp mai a, ram tana hnawksak ber zinga mi tih hi a dik a ni. Mipat hmeichhiat hmansual, natna thalo hrang hrang theh darh, rukruk, accident leh ichhungkaw buaina hrang hrang te hi Ruihtheihthil kaihhnawih vek a ni ti tila a dik mai awm e. Heng zawng zawng ti bo tur leh ti reh tur chuan ruihtheihthil tha lo zawrh leh hman dona kawnga chet lak a tul leh ngei dawn tihna a ni. Khawtlang nun siamthat tura hmalakna kawngkhat pawimawh em em chu ruihhlo do hi ni reng dawn niin a lang.
Khawtlang nun siamthatna kawnga hmalakna thar hian a tha zawngin Mizoram hmel tidanglam ngei sela a duhawm hle a, Kohhran atang pawhin helam hawi inzirtirna hi kalpui mek a ni bawk a, pheikhai rual taka kan tan ho chuan a rah tha takk kan seng ngei ang. Tute emaw hmalakna tur bikah dah lovin, mahni zawn theuah, kan phak tawk ang zelin tang tlang ila, thang leh thar zel turte tan kawng tha tak kan lo sial dawn a ni.

POLICE AN CHE THA

2010-01-24T08:20:00.001+05:30

Tunhnaiah thil tha lo, danbawhchhiatna liantham chi hrang hrang a thleng nual a, heng thil thleng chugchangah hian Police te hmalakna a thazawnga hriat zui tur a awm deuh zel a, Mizoram Police te an fakawm viau a ni.

Nikum November ni 13-a Bungthuam khua Zarzokima , Pu Lalngilneia fapa thah chhuina kal zelah he thil thlenga inhnamhnawih nia rinhlelh Bru hel 2 te chu Special Investigation Team ten Pathianni kalta khan an man a, chungte chu Self Style Lt. Vanlalfela, Tuirum leh Self Style corporal Chusarai, Tuipuibari Centre te an ni a, hemi hnu hian an hotupa bera ngaih Lalthazuala chu Mizoram Police leh Mizoram-a Assam Rifles-te’n Mizoram leh Tripura ramri-ah an man leh a ni.
Bairabi khaw bula Tuikuk chenna, Lenhmuikawn-a Tuikuk In 7 awmna, Lenhmuikawn-a Bubhan Joy Riang-a In chu December ni 18 khan hal a ni a, a haltute Lalsawta Riang, Remruata Riang leh Umchurai Riang South Chhimluang mi vekte chu Bairabi Police-ten man nghal ani.
Mizoram Police leh Border Security Force G Branch tangkawpte chuan Vairengte-ah mi 3 hnen atangin pawisa lem, cheng sangkhat note hlir, nuai 1, sing 6 leh sang 4 chu Kisma leh kumthar inkar khan Vairengte-ah an man a, a kawltu Uddin Choudhury, Cachar District mi, Vanlalruata, Edenthar Veng Aizawl leh Vanlaltluangi, Armed Veng South-a mite manin chumi hnuah, pawisa lem siamna khawl leh a hmanraw chi hrang hrang bakah pawisa lem siam sa, cheng 500 leh 1,000 note engemaw zat kawl Pi Mawii leh midang pahnih man leh a, Aizawl SP hnuaia District Special Branch (DSB) hnathawkte chuan pawisa lem, a tak ni se cheng 86,000 a kawltu Lalramnghaki, Ramthar Veng an man zui leh bawk.
Aizawl Bungkawnvenga cheng Taxi Driver Chawnghmingthanga thlahlui December ni 8 atanga chin hriat lohva bo thattu Laltanpuia chu jan ni 12 khan Police ten manin Chawnghmingthanga ruang leh taxi pawh an hmuh chhuak leh a ni, chutiangin thlahlui ni 29 zana Dapchhuaha a fahrawn pawngsuala thattu, Ramthianghlima chu khawtlang hruaitute nen thawk hovin Mamit police ten an man nghal bawk a ni.
Myanmar mi, Mobile Phone leh Computer dawr tam tak rawktu nia hriat, Jai atanga tlan chhuak zawn lai mek,Chinsianmuan, Zorammuana tih leh Muana tia hriat bawk chu Bawngkawn Police-ten an man bawk.
Thawk khat laia Police indaihlohna leh Police, hmanraw changkanga thuam that (Police Modernization) sawisel a hlawh viau lain, Police Officer thenkhatinan mimal huan leh lo lama police engemawzat chhawr nasa tiin police officer ten dem an hlawh hle bawk.
Hengte avang pawh hi a ni mai thei e, Home Minister chuan a Police Officer zingah an hnuaia hnathawk, police te chu an huan lama chhawr lo turin a duh tih tarlangin, huan lam enkawl nuam ti mi an nih zawk chuan Huan enkawl tura bang mai turin thu rawn a pe hial nghe nghe a ni.
Congress Party-in sorkarna a chelh veleh khan Home Minister-in Police te hi an hna dik tak thawk thei turin, thil danga chhawr buaina lakah an fihlim tur a ni a ti a, hetilamah kum khat a ral hnu hian eng ang chiah nge an dinhmun kan hre lem lova, amaherawhchu an hna thawh tha tak tak hriat tur a awm ta mek a, hun an kal deuh a nga, enge an an zel dawn kan hre lo na a, Aizawl khawpuiah phei chuan zan lamah ngawrh takin an duty reng a ni.
Police te hi tunah chuan mipuiin an ringin, an chungah an innghat ta viau niin a langa a lawmawm hle, sorkar pawhin thuam tha sauh sauh sela, tun anga an thawh zel chuan Mizoram tan hmel thar, thil inthlakthleng ‘change’ a awm kan ti thei ang.

THIL THA TI TURIN KAN LA INTHURUAL THEI

2010-01-19T08:03:00.001+05:30

Krismas leh kumthar vuakveta Halpuah hal lo tura inzirtirna leh khapna thupek chuan Mizoram pumah zawm a hlawh the hle a, hmalatu sorkar leh YMA bakah mi tamtak beisei aiin mipuiin an zawm tha niin a lang. Kum kha leh chen kan lo tih thin tawh a nih avangin Kumthar zana halpuah thawm hriattur a awm miah lo kha lehlam zawng chuan a khawhar thlak rum rum zawk a ni, chuti hawp chuan mipuiin zirtirna leh khapna thupek an zawm tha a ni.
Mizoten kum 50 bawr vel atang a Krismas leh Kumhlui thlah zan a piang a halpuah hal ngei ngei tur anga ngaihna thinlung kan lo put tawh hnua, Halpuah leh Halmawi lam tel miah lova kan han hmang thei kha thil chhinchhiah tlak a tling tak meuh a ni tih kan Home Minister chuan a sawi a ni.
Heti taka halpuah hal khapna thupek kenkawhna kawnga hlawhtlinna kan neih theihna chhan hi a hun taka sorkarin hma a lak vang te, Dan leh thupek kengkawhtute thawh rim vang te leh Tlawmngaipawl, YMA te hmalak vang kan ti thei anga, hengte bakah hian Media lama tanla tute bakah mipui te thuawih vang a ni.Kan inthurual chuan thil tha kan ti thei tih chu tun tum Krismas leh kumthar vuakveta halpuah khap chungchangah khan a lang chiang a ni. Thil thalo nia kan pawm tlan vek, sorkar leh mipui pawhin kan duh loh kan khap rem theih loh emaw, kan ven sen loh emaw chungchangah hi chuan kan inthurual tawk lo ti ila a dik awm e.Inlungrualna tel lo chuan khapna thupek ringawt chu a hlawhtling harsa hle a, chuvangin khap ngai tur chi, kan ram leh hnam tana thil thalo hmachhawn tur chuan lungrual taka kan pawm tlan theih zawnga chet lak dan thiam a pawimawh a ni.
Halpuah hal khap hi Zu khap tirh ang deuh khan, a tir lamah hlawhtling viauin lang mahse, a hnu lamah a sawisel pawl lo pawng tial tialin khapna leh inzirtirna kal mek a tibuai thei tho mai a, chuvangin halpuah lamchi khapna dan kalpui zel dan tur pawh hi zirzui a pawimawh khawp mai. Media lamah ngaihdan hrang hrang a darh tan leh ta mek a, chuvangin mipui kaihruaizui thei tur, thu mum mumal tak inkawhhmuhzui a pawimawh deuh deh dawn a, ngaihthah chi niin a lang lo.

NGAIHHLUT TUR DIK TAK HRIAT A NGAI

2009-12-19T18:56:00.001+05:30

Mizote hi zai leh rimawi ngaina mi kan ni, sakhuana thilah pawh zai leh rimawi tel lo chuan kan che hlei thei lo a ni ber mai. Chutiang chu kan nih avangin helam pang thilah hi chuan kan thawm a ring viau zel a ni. Hman kum atang khan Aizawla cable network thenkhatin Icon,leh Idol tih lampang chi leh thil dang dang, inelna chi an rawn ti chhuak a, mipuiin kan lawmin kan hlimpui khawp mai. Hetiang inelnaa tel tur pawh an pung tual tual bawk a ni. Mipui nuai 3 chuangin SMS hmangin vote kan thawn an ti a ni. Zai leh rimawi lama mi thiam leh talent nei tha tak tak te zawn chhuahna leh inpholanna remchang a ni a, thil tih chi tak ni pawhin a lang. A huaihawttute tan a manhla a, a ti tha ho tan pawh a hlawk bawk. Khawvel hmundanga an tih ve reng tho a ni.
Heng thil chi hrang hranga atanga mi langsarte mipuiin kan cheibawl dan erawh hi chuan bihchian a dawl lo niin a lang. YMA Branch, V/C leh a khaw nawta kan inbuaipui ta luai luai zel mai a, hmun thenkhatah chuan harsatna a thleng ta mek a ni. Khua leh veng tihmingthatu chuan chawimawi an phu a ni, amaherawhchu a chin tawk kan hriat thiam a pawimawh. Hetiang intihsiaknaa tel thenkhat chu an khua leh veng ten an chawimawi tawk lo nia ngai, lo vuipui te pawh an awm ta nawk mai. Thenkhat chuan khawtlang hruaituten an tawiawm ngei turah an ngai nghet tlat tawh a ni mai thei. Bialtu MLA tan pawh chet ve loh zahthlak khawpin kan incheibawl thin a ni ta ber. Kum tin thil chi hrang hrang kan la ti zel turah ngai ila, khawtlang rorel khawl meuh leh pawl lian tak takte a meizang hlapa chetna tham thil a ni em tih kan ngaihtuah fo a tul a ni.
Thawhrimna vanga mi hlawhtling te hrechang lek lova, hlemhletna avanga mihausa te kan khawtlangah leh Kohhranah chanvo kan pek fo chuan ngaihhluttur diktak thangtharte kan kawhhmuh sual tihna a ni ang. Taima tak leh rim taka thawh chu hlawhtlinna a ni tih lam inkawhhmuh lova, zawmthaw taka sum hailuh dan kan inkawhhmuh chuan thang tharte chu kan hruai sual ngei dawn tihna a ni.
Aizawl khawpui bikah, mobile phone leh two wheeler chu thalai zingah hluar taka hman a ni. Mahni thawhchhuah ni hauh lova, pir tak taka thalai chetla vel hi ngaihsan tur a ni hauh lovang. Nimahsela nula tam takin an nu leh pate hnenah scooty lei an ngen a, an mamawh vang lam aimahin an thian ten an neih bik vang te a ni mai mai a ni. Hnathawhna leh zirna kawnga mamawh ni si lo, tangkaina nei hauh lo thil tam tak chu thalaite hian an inngaihsan siak emaw tih mai tur a ni.
Tun anga kan kal zel chuan a chhan leh vang lam engmah chhut lovin, mihausa leh mi lar apiang kan ngai sang anga, thangthar te leh kan ram hian a chhiat phah hret hret dawn a ni.

NGAWLVEITE ENKAWLNA

2009-11-14T15:05:00.001+05:30

Ruihhlo ngai leh ngawlveite enkawlna kawnga mi inpe leh thawk engemawzat Mizoram chhungah hian kan nei a, heng mite inpekna leh thawh rimna zarah nunphung pangngai an zawh lehmi tamtak an awm a ni. Heng mimal leh pawl ho inpekna leh thawhrimnate kan hriat puia kan fak rual hian, thil thenkhat ngaihtuah tel ngai a awm a, chu chu heng tlawmngai pawlte hian mahni seh seh mualhranah tiin an kal bawrh bawrh mai em ni tih te, chhawmdawlna state sorkarin a pe ve reng em tihte leh an mahni ngei ho hian thawhhona tha an nei em tih te hi a ni a.
Sorkar laipuia Ministy of Social Justice & Empowerment chuan heng ruihhlo ngawl veite enkawlna tur leh chhawmdawlna tur hian scheme a nei a, chu chu Mizorama Tlawmngai Pawl thenkhat, Home nei leh enkawltute kan tih mai zinga 10 bawr vel hian an zuk dil ve kumtin a, Social Welfare Department kaltlangin an dil thin a ni. Tanpuina tangkafai hmute sawi danin an sum hmuh chu a hnianghnar lova, a regular lo bawk a ni. Amaherawhchu heti chung chung hian an rawngbawlna chu eng tin tin emaw an kalpui ve zel a, State sorkara scheme thenkhat, a bik takin MSACS leh a kaihhnawih thil dangte atanga programme tlem tlem an khawih tel avangin, eng tin tin emaw an Home te chu an kal pui hram hram zel a, harsatna erawh chu an tawk nasa niin an sawi. Heng te hi sorkar laipui atanga tanpuina a khat tawka dawngte chungchang a ni.
Hetianga sorkar laipuiin a tanpui ve loh Home tia kan sawi mai, ngawlvei enkawlna hmun dang tam zawk Mizoramah hian an la awm a, chungte chuan a vaiin ngawlvei 1000 dawn lai an enkawl nia chhut a ni. Heng ngawlvei enkawlna hmunte hi mi thahnemngai leh inphalte thawhlawm tling khawm atangin an inenkawl a, Pawl leh kohhrante pawhin an tanpui bawk thin. state sorkar atanga tanpuina emaw sorkar laipui atanga tanpuina emaw mumal takin an dawng lo a ni. Chuti chungchuan ngawlvei engemawzat an enkawl mek reng a ni.
Ngawlveite enkawlna hmun sorkar chuan Sethawnah a nei ve a, chu chu ngawlvei enkawlna hmundangte tana model leh training-na hmun tur a tana vauchher a ni. Amaherawhchu tunah hian hman tangkai a ni lo. Ngawlvei dam lehte chhawmdawlna hmun, atan sorkarin buatsaih a tum a, hma pawh a la a ni awm e. Amaherawhchu chu, ngawlveite enkawl hi sorkar hnathawha thawhchi a ni em tih leh, tlawmngai pawl, rawngbawlna a ngaite kuta hlan chi a ni zawk em tih hi a ni. Sorakar tanpuina dawng reng reng lo, Home tam tak an awm theih dan kan chhut chuan, ngawlvei enkawl hi Mizoramah chuan rawngbawlna chikhat atan kan ngai ti ila a dik awm e. Chuvangin Mizoramah hi chuan social worker te kutah ngawl veite enkawlna leh chhawmdawlna hi dah thiam ila a sawt zawkin a rinawm ta a ni.
Sorkar chuan heng Home tan hian chhawmdawlna State budget atangin kumin hian a ruahman a ve nia sawi a ni. Hetianga State sorkarin ruihhlo ngaite enkawlna suma a pui ve dawn a nih chuan kaihhruaina leh kalphung duangin, an chungah thuneihna nei turin inkaihhruaina pawh siam sela a tha khawp ang. Tunah chuan Home hrang hrang tih dan phung a dang hret hret hlawm a ni. Ngawlvei ho lah Home pakhat atangin Home dangah an pakai kual a, chutih laiin Home leh Home inkarah thawhhona thuthlun a awm si lova, a dik tak chuan ngawlvei zat record pawh kan nei thei tak tak lo a ni. Home thenkhat an khauh deuh laiin thenkhat an dul deuh a, minimum standard zawm tura tih theihna Dan a awm rih miau silova, an tih dan danin an kal lo thei lo a ni. Sorkar laipuia tanga tanpuina hmu, Home te erawh chuan sorkar laipui duan, minimum standard an zawm chauh a ni.
Ngawlvei enkawlna kawngah hian ruhmanna mumal tak kalpui a tul a, District tina neih a tul em tih te, District pakhat chhungah a awm tam lutuk tawh em tih te pawh enfel a ngai a, a hman hman leh phur apiangin an duhna hmuna Home an siam mai thin pawh a tha em tih thlenga enpui turin sorkar chuan Dan a siam a ngai a ni. Ngawlvei enkawl dan hi chhawng thum lian tak takin then a ni a, Counselling Centre, De-addiction Centre & Rehabilitation leh Follow up Programme te an ni. Ngawlvei enkawl tu pawl te hian heng thil te hi an thawk kawp deuh vek a, a mal khaia buaipui tham vek an ni. Heng hma lakna hlawm lian tak tak te hi tuna Home enkawltute hian in thawh sem vek sela, chuta tana mithiam bikte pawh ruaiin thawk sela, tun ai hian a let tam takin a sawt ngei dawn a ni. Kan thawhhonain a zir loh avangin Home engemawzat kan neih mek lai hian, a khat tawka Ngawlvei Camp emaw Boot Camp emaw buatsaih a bang thei lo.
Chuvangin Ngawlvei-te enkawl dan hi ngaihtuah chian a tul a, ruahmanna mumal tak leh Dan hnuaia thawhhona kan dap vat a tul a ni.

CHHAWMDAWLNA A CHHIATPUI THEIH

2009-10-16T06:09:00.001+05:30

Mizo te hi kan pi pute hun lai atanga ram lama ei zawng, khawvel thiamna leh finna tam takin a tlawh pawh hma pawha mahni chhungkaw eikhawp thlo chhuak, a tul huna hmeithai rethei dawmkang thei tura inpeih at hnam kan ni a. Hmeichhe in awm mai mai pawhin puan tal an tah a, nauno pawm hmeichhe thenkhat leh pitar chakvak lo innghak chuan la an kaih loh leh vawkchaw chum emaw, naupang lo kilkawi emaw an ti a, putar te pawhin daihnaiah hnang lain chhungkaw mamawh eng eng emaw an tah melh melh thin. Pumah te inkawmkhawmin hnangtah tur an thawhchhuahpuia thin. Naupang hnathawkthei chin pawhin thinglukham put leh thingtang kawih bakah lo lam hna an thawk a, damlohna khirhkhan tak vang lo chuan nula leh tlangval chhunah inlamah an awm ngai lo a tih theih a ni. A biktakin hmeichhiate chuan khawsakrel, tui chawi, buh den leh la deh te chu an mawhphurhnaah an la a, mipa an phut ngai lo. Chutiangin mipa te pawhin hmeichhe awmnem zawkte chu ram lam a ni emaw, inlam a ni emaw hna rum leh hautakah hmeichhiate an awl a, hmeichhiate thlamuanna thamin an uap tlat thung a ni. Heng zawng zawng hi kan chhut chuan Mizote hi hna thawk mi, taima leh mahni intodelh kan ni thin.
Hmasawnna leh chankanna hrang hrang avangin tunlai leh hmanlai hun tam tak chu khaikhin a remchang vek lo mai thei a, amaherawhchu, Mizote hi hnathawkmi leh taima kan nihna te, zawmthawt ngai thei lo, tlawmngai hnam kan nihnate erawh hi chu thangthar zelah a langsar ta lo hle kan ti thei awm e.
NREGS leh BPL inhlawhna chungchangte kan bih chian chuan kan harsatna min phuhrukna lam leh kan hma hun tur atana kan khawsakzia a her danglam dan hi buk tham a tling ta niin a lang. Heng thil thatak te hi hnam nunphung ti chhe tuah a tang thei a, ngaihtuahna leh rilru lam inzirtirna tel miah lova kan kalpui bawrh bawrh chuan kan hnamin a chhiatpui thei a ni. U/T hun laia sum awlsam lutukin kan nunphung a ti chhe viaua sawi fo a ni, chutiang bawk chuan heng, kawng hrang hranga chhawmdawlna leh tanpuina awmthei te hi a hun lain tangkai takin lang mahse, hnam nunphung tichhetu a ni thei vek a ni.
Central Labour Rules-ah chuan inhlawhfak dan chiang takin siam a ni. Nikhatah darkar 7 thawktu chuan nikhat hlawh a la tur a ni a, chu chu a dikna leh chanvo a ni. Naupang inhlawh phal a ni lova, child labour, naupang inhlawhfak hi Dan-in a khap a ni. NREGS hnuaia ni 100 inhlawhfakna hi enganginnge kan kalpui enfiah a ngai hle. Danin a phal angin inhlawhfa turin dikna kan nei ngei ang, dik tak leh dan ang thlapa thawk tur kan nihna lam erawh chu kan hlamchhiah a ni mai thei. NREGS hnuaia inhlawh a nih chuan inthlahdah deuh thei tura indahna te a awm a ni mai thei, mahni khaw chhung ngei hmasawnna tur leh mahni ngeiin akn chhawrzui tur atana hna thawk kan ni vek a, thahnemngai tak thawk tur kan ni, chutiangin BPL hnuaia inhlawhfa kan nih pawhin a dang chuang hauh lo. Hmun tamtakah chuan sum sen leh hnathawh a inman lo hle nia sawi a awm. Kaihruaitu Village Council te nge a enkawltu Deptt. mawhphur dawn ? Hetiang hi a ni tak tak a nih chuan, heng tanpuina sum hian Mizo zemawi, taimakna leh rinawmna te chu a umbo mek tihna a ni ang.
IWDP atangin mahni huan leh lo-ah ngei kan inhlawh a, thil lawmawm tak a ni. Chupawh chu endik sak kan ngai a, chuti chung pawh chuan a la dik tawk lo a ni awm e. Ruahmanna chu a tha, nimahsela a hmangtute rilru leh sukthlek dan dik lo takin a kaihruai thei tih hriat hmaih hauh loh tur a ni. Rinawm tura inzirtirna leh kaihhruaina mumal a awm tel si loh chuan kan chhiatpui thei a ni. Mizo aia hnamdang hlawhfa a chhawr hi Mizo vek hian kan thlang fo mai. Mahni lo leh huan, mahni khua leh veng chhunga hlawhnei chunga kan thawh pawha kan rinawm tawk lohva kan zelthel thei a nih chuan hnamdang taima leh rinawm zawka thawkte chu an thlanawm zawk fo dawn reng a ni. In enfiah a ngai a ni.
Awlsam taka sum hmuh theihna a nih dawn chuan mi tam takin rinawmna leh taimakna kan hlamchhiah hreh lo ni berin a lang. Chawmdawlna sum tha tak tak te hian rilru puthmang awlsam takin a kuai her thei a, sorkar leh mi thahnemngai te’n hetiang ruahmanna hi an siam a nih pawhin rinawmna leh taimakna uar taka inzirtirna hmanruaah kan hmang tel lo a nih chuan, kan taimaknate, kan rinawmna leh kan zahawmnate a dal tial tial anga, kristiante tiha mawi lo thil tam tak chu kan nunphungah senglutin, thangthar thar zel nuinin a chhiat phah dawn a ni.
Chuvangin chhawmdawlna sumte hi taimakna leh rinawmna kawng inzirtirna hmanrua atan hmang ila, chuti a nih loh chuan kan chhiat hlen phah hlauh thei a ni.

TLAWMNGAI PAWL LEH SORKAR THAWHHONA

2009-09-28T09:52:00.002+05:30

Mizoramah hian khawtlâng ţhatna leh hmasâwnna tura mipuiin tha kan thawh thin hi thenawm State te dinhmun en chuan a chhunawm hle a ni. Khua leh veng chhunga sorkar inrawlh ngailova kan inrelbawlna leh hnatlang neih zawng zawng te hi kan chhut ngai lo mai thei, kangmei leh leimin avanga chhiatna lo thleng kan inchhawmdawl dan te, Mautam tam a lo nia, tlawmngai pawlte, kohhran leh mimal te inpekna te kha sawi tham a ting a ni.
Kan society-ah tih dan phunga kan neih tawh avangin vehbur khawnte, thawhlawm khawnte hi thil mak a ni lo. Amaherawhchu heng thil, kan kalpui mekte hi ram chhung hmundang tan chuan thil mak a tling a ni. Chuvangin hetianga khawtlang leh midang tana kan inhuamna leh kan inphalna hi ram chhûng hmundangte nêna tehkhin hleih theih loh khawpin sawi tur a tam a ni. Kohhran budget pumpui deuh thawh hi a thawha kan thawh khawm zel tur a ni ber mai a, hnamdangin min tluk thei hauh lovang.
Mizoramah hian tlawmngaipawl an ţangkai a, sorkar tân pawh kawng tam takah innghahna an tling a, Electoral Roll siam, Village Census, Ration card siam, NREGS Survey leh thil dang dangah sorkar kutke ber pakhatah YMA te an awm a ni. BPL leh AAY survey tura hma lak ho tum leh mek a ni awm e. Tlawmngaipâwlte tel vena tur chia policy duan a tam lutuk ta hi a chhan enge ni ang ? Sorkar Department te hian an mi leh sa te dik leh rinawm taka til ti turin an ring zo lo nge, hahdam zawka tihdan kawng an dap tih te, rinawm leh dik taka hna thawk turin heng thil hrang hrang survey ngaiah te hian mipui kan rinawm tawk tawh lova, huaisen leh tlang taka ti thei tur tlawmngaipawl kan ruai ta mai tih te pawh hi ngaihtuah tham tak a ni ta mek a ni.
Sorkar hian rawng a bawl sak, mipuite nên thawhhona ţha nei turin mipui kutah mawhphurhna a dah tulna chin a awm ang, amaherawhchu dah chin tâwk a thiam a ngai a, chutiang bawkin mipuite pawhin sorkar hmalakna leh sorkar nena thawhhona kawngah mipuui chanvo leh tih theih chin hriat a tul a ni. Sorkar chuan hma a hruai anga, mipuiin a hlawhtlin na mahni zawn theuhah kan thawk ve ang. Kawng ţhenkhatah chuan tlawmngai pawlte’n hma an hruaia sorkarin a zui ve zâwk nia ngaih theihin a awm fo thin, hei hi a fel tawk lo a ni. Hemi kawngah hian sorkar chauh a ni lo, tlawmngaipawl leh mipuite pawh kan inbih chian a pawimawh a, thuneihna tluantling nei silova sorkar hmakhalh a awm thei a, fimkhur fo tur a ni.
Tlâwmngai pawl lian tak tak te hi sorkar committee engemawzatah an tel a, an tel loh pawha pawi hauh lo tur a awm nual mai thei a ni. Sorkar Department hrang hrang-te hian tlâwmngaipâwl tel vêna awm chî leh an tel ve kher lova tih theih te ennawn thin sela thil ţha tak a nih a rinawm. Department ţhenkhat chuan an mahniin an tih fel ve mai theih thilah pawh tlawmngai pawl an ruai buai fo tawh ţhin a ni.
Sorkar hian a dinhmun leh zahawmna vawnghim turin tlawmngai pawl leh mipui-te kuta mawhphurhna dah dân chin tâwk a thiam a pawimawh. Ram leh hnam tâna ţhahnemngaihna kil hrang hrang aţangin a lo ri a, thlur bing neia pawl dingte pawh an la awm zel ang. Sorkar hmalaknaa tel tum leh inrawlh tum an la piang zel dawn a, sorkar chuan a thuneihna vawng him turin fimkhur leh huaisen taka a kal a ngai deuh deuh dawn niin a lang. Chutiangin tlawmngaipawlte tan pawh Department hmai bal phihfai tura hmanrua-ah Committee thenkhatah chuan ruat ve mai mai an ni lek thei tih te pawh an hriat a tul a ni.

MIZO NIH HI A NUAM

2009-09-26T16:05:00.004+05:30

CM's Trophy in cultural dance competition - Aizawl sipai lammual

HMASAWNNA VRS PI LEH PU TE PUITHUNA

2009-09-05T21:24:00.004+05:30

Aizawl:5.9.09:Tun hnai mai khan Aizawl veng pakhat-ah chuan mitthi an awm zing hle mai a, hei vang hian an veng YMA-in Kuang an siam lawk chuan sawi a hlawh phah hle a ni. Chuti taka chhiat an tawk nasa ta mai chuan engemawti zawng takin chhan a neih an ring a, thenkhat chuan an kuang siam lawk chu an puh a ni deuh ber.
Kan pi leh pute khan serh leh sang, thiang leh thiang lo, dan leh hrai bakah puithuna thil chi hreng hrang kalpui an nei tlat a, an ngaihdan pawh a nghetin sawh sawn a har khawp mai. Kan pi leh pute puithuna atanga thlir chuan kuang siam lawk pawh hi a pawmawm lova, thlan laih zawh tawhsa pawh engemaw vanga hman a tul leh lo a nih chuan vur leh khar an duh a ni. Hemi zulzui deuh hian tun hnuah thlanmual sam fai te pawh hi thenkhat chuan an duh vak lo zui ta zela, ruang a chhuak duh niin an ngai a ni awm e. Lo atan Zawng lu ro leh thing lu bul awmna an duh lova, leiruang tuam tih leh Sih te pawh lo atan an nei tel duh lo an ti bawk thin. In sak hawi dan zawng te, khum hun dan zawng te, inneihna atana thla serh neih te, mitthi awm vanga a chhungte an inthian thin te, heng bak pawh hian kan pi leh pute Puithuna thil sawi tur a awm teuh thei ang.
Hetih lai hian khawvel changkang leh hun inher danglam zelah thangtharin ngaihdan dang an rawn nei ve ta a, Kristiante inzirtirna leh Science lama hmasawnna-in thangtharte ngaihdan hi a kaihruai nasa a, kan pi leh pute Puithuna thenkhat chu Puithuna Atthlak niin an hre ta a ni. Kan pi leh pute hun laia tlawmngaihna lan chhuah dan leh tuna tlawmngaihna lanchhuah dan hi a inang tawh lova, khawsak dan a danglam nasa lutuk a, khaikhin thiam pawh a harsa tawh a ni. Tlawmngaia khawhar inriah chungchang thlengin khawpui thenkhatah chuan chhut chian a lo ngai ta a, Chutiang bawk chuan kan pi leh pute puithuna leh thangthar ngaihdan pawh hi chuktuah rem thiam a harsa a ni. A chhan bulpui ber chu hmasawnna a ni kan ti thei ang. Puithuna chungchangah hian rual u zawk leh thangtharte inkarah inhnialna a ti chhuak ta mek a, thelh dan pawh thiam a har viau a ni.
Lehkha thiam hauh lo, science leh geography pawh zir ve lo, kan pi leh pute khan thil tam tak an thiamin, an hre ve riau mai a, an ngaih dan leh tih dan thenkhat te chu kan hman hlen tur pawh a awm dawn niin a lang. Khawvela thiamna leh hmasawnna hrang hrang an hman tangkai phak ve loh avangin Khuannun finna leh remhriatna a pe ngei ang tih pawh ring ila a dik awm e. Amaherawhchu an ngaih dan tam tak chu Puithuna Atthlak nia sawi tur a awm ta nawk mai. Mizote sakhaw vawn, Kristianna phei chuan hmanlai kan pi leh pu te ngaihdan tam tak a kalh nghe nghe a ni.
Ruang chhuak tur kuang siam lova kal tir chu khua leh veng tinin kan hreh a ni, kuang kan siam chawp chuk chuk thin, chuvang chuan ruang chhuak tur kan chelh khawtlai lo thei lo. Tunhmaa kan tih ngai hauh loh, hri thalo laka fimkhur vangin kuanga indah vat ngai a lo awm ta zel a, eizawnna leh khawsak a danglam nasa ta em em a, kan hun neih dan leh hna tul dan te a inchen lova, chhiatni thatni hman dan thlengin siam rem a lo ngai ta a ni.
Kuang siam lawk chungchang pawh hi Puithuna atanga thlir chuan sawi hnawmna tur leh ngaihbel tur chu a awm kumkhua mai thei, Mizo ruang kan inhal ngai lo. Nimahsela Pune-a vanduaithlak taka Mizo tlangval Swine Flu vanga boral ta kha Doctorte duh danin hal ral a tul ta. Thlaserh pawh sawi tawh chuang lova July leh August thlaa lungsi taka innei sawi tur tam tak an awm tawh a, Aizawla veng pakhat chuan thlanmual an neih hlat vangin thlan laih chungchangah harsatna an tawk deuh ni ngei tur a ni, hman ni lawk khan thlankhur laihsa neih mai a tha lawm ni tih chu an thlir ho tawh a ni.
Hnah hlui an til a, hnah thar an lo chawr a, hranghlui an liama thangthar an lo chhuak a, tihdan thar leh tha zawk, remchang leh awlsam zawk dap a ni ta zel a, thiamna leh finna a sang zel a, thil thar a lo chhuah belh zel a, thangtharte khawvel-ah hian thil tam tak a inthlak chho zel dawn a ni. Kan tihdan leh khawsak dan te hi hnuchhawna tih dan thar kan hman a ngai zel ang. Tuna kan khawsak dan tam tak pawh hi thangthar leh zawk te’n an la rawn kalsan hun a awm leh thovang.
Kan pi leh pu te’n Puithuna thil thenkhat an ngaihpawimawh thin te chu hmasawnna avangin kan ngai pawimawh lo hret hret a, sakhuana avangin a then kan hnawl bawk a ni. Science lama thiamna leh Kristian inzirtirna hian kan pi leh pute puithuna tam tak chu a atthlakzia a pholang ti ila a dik mai awm e.
Heng zawng zawng hi kan ngaihtuah chuan rilru zau tak nen hun lo kal zel tur hi rual u zawk te pawhin an pawm thiam a ngai deuh deuh dawn a ni.

INTODELHNA KAWL A ENG TAK TAK EM ?

2009-09-02T19:58:00.007+05:30

Aizawl:29.8.09: Ei leh bara intodelh tur hian kum tam tak kan bei ta. Kan politician te’n min zawrh ber leh an ni pawhin a hralh tlabera an dah chu intodelhna tura policy ţha siam leh hmalak a ni. Ministry hrangin an party a hrang ang bawkin policy hran theuh an vawrh chhuak a. Garden Colony te, NLUP te leh MIP tin te chu kut hnathawktu tam tak tan thlamuanpui tham tura ngaih a ni a, kuthnathawktute intodelhna tura a bulpuiber-ah dah an ni. Heng Programme hnuaiah hian thlai chin, ran vulh leh a kaihhnawih thil dang dangah hmalak a ni. Tama tak sawi tur zingah Tung, Sawhthing, Sapthei, Thingfanghma, Fu, Alu, Aieng, Hmarcha, Cardamom, Jethropha, Oilpalm leh thlai dang ţhenkhatte hi kuthnathawktu te tan, an intodelhna theihna tura thlai chin tura kawhhmuh lâr zualte an ni a. Heibakah buh chîn dan leh lo neih dan kalhmang hrim hrim pawh her dang lam chhoh hret hret a ni bawk a. Intodelhna tura hmalakna tam ber te hi Agriculture leh Horticulture Department aţanga hma a ni ber a ni.
Union Territory aţangin State-ah kan inhlangkai a, a nawlpuia kan intodelh theihna tura hmalakna hlawhtling sawi tur tunthleng hian a awm hlei thei lo a ni. Kan intodelh theihna tura hmalak chu vawiin thlenga kan politiciante min tiam a la ni ta fan a, hunk al tawk kan thlir kir chuan Mizoram sorkara eng ministry mah indem thei an awm chuang lo.
Tun thlenga ei leh bar kawnga kan intodelh theih loh chhan hi enge ni ang ? Policy kan la thlang fuh lo em ni ang ? Nge, heng policyte hi ti hlawhtling turin rinawmna leh taimakna kan tlachham zawk ? A nih leh, intodelh theih kan inring tak tak em ? Kum engemawzat intodelh tura hma kan lak hnu hian, zawhna chhan tur tam tak kan nei tawh a ni. Sawrkarna fawng humtu party leh Department-a kan mithiamte pawh hian ei leh bar kawnga kan intodelh theih hi an lo ring tak tak ţhin rêng em tih te pawh hi ngaihtuah theih tak a ni ta hial a ni.
Intodelhna tur hian Department hrang hrang ţan ho a ngai a, Agriculture Horticulture, Industries, Rural Development, Sericulture, Fisheries Department te hian Department dangte nena pheikhai rual taka hma an lak loh chuan intodelh a harsa tih kan hre tawh. Kuthnathawktu te zingah mahni tuizawng thlang felin an belh tur Department pawh thliar fel thei turin heng Department te hian inthlunkhâwmna nei sela, mipakhatin Department pahnih pathum hnuaiah hlawhtling tak tak mang lovin kawng hrang hrangin hma lain tanpuina te an dawng a, hetiang nilo hian Department lamah zawk, convergence scheme, inthawh ţawm tur, mipui intodelh na tur project, duang thung sela tih te ngaihtuah a ţul niin a lang.
Tunah hian Congress Ministry thar chuan tun hmaa a lo kalpui tawh New Land Use Policy chu thawmthain a hma aia hlawhtling zawka kalpui turin tan a lathar leh chu a ni a, kuthnathawktute tana nghahfak ber leh kan intodelhna tura kan hmachhawp pawimawh ber chu a ni leh a, mipui beisei anga a hlawh tling lo a nih hlauh chuan tun hma aia nasain beidawnna ruamah kan tawlh lut anga, eng policy mah minkhai chhuak thei tura beisei kan nei tawh lovang.
Intodelh tura hmalaknaah hian sum tam tak sorkarin a dah ţhin avangin dik tawklova sum hman palh theih a ni a, dik tak leh a nihna tura sum hman a nih ngei theihna turin mipuite pawhin mawhphurna kan nei a, party politics kan paih a ngai a, rinawm tak leh taima taka hna kan thawh loh chuan eng ang pawhin sorkarin ruahmanna tha siam mahse kan intodelhtak tak thei lovang.
Intodelh tura hmalakna-ah hian politics-a hamţhatna ûm avangin thui tak hna a thawh theih a, sorkar hna thawk pawhin dan pangngaiin a thawk thei a, kuthnathawktu lam pawhin eng eng emaw chu a tih ve theih mai bawk a, amaherawhchu, politician te, Department hotute leh kuthnathawktu ngei ngeite pawh hian, ei leh bar kawnga intodelh turin beiseina an nei tak meuh em tih leh beiseina neiin hma an la tak tak em tih hi bih chian a ngai ta niin a lang.Swrkar ministry tharah hian intodelhna kawl a eng tak tak dawn em le ?

SOLO:Malzai

2009-05-20T07:08:00.003+05:30

Malzai(solo) tel lo hian function kan nei thei em ? Inneihna,inkhawmpui leh gathering pawimawh deuhah chuan zaithiam an zai loh chuan a kim lo riaua hriatna kan nei tawh a ni ber law'mi ? Solo hi thil dangin a thlak theih a ngem ka ti thin. Solo han tih hian thangthar rilruah phei chuan malzai tihna a ni ringawt tawh e! Naupang te zual phei chuan solo theih hi an chak ber a ni mai a, Mizo hian rimawi leh zai kan ngainat vang chu ni mah sela, thil thar ngaihtuah kan tum lo ni ve bawkin a lang. Solo tel lova function neih ngam hi a tul ve ta khawp mai.Hla pakhat sa tura hmanraw tha(sound system) hman hautak dan lah kan hre theuh a.

RUALBANLOTE HMAKHUA

2009-05-03T07:16:00.002+05:30

Kum 2001 chhiarpuiah khan Mizoramah pianpunga rualban lo mi Sing 1, sang 6, leh 11 an awm a, chu chu za zela 1.80 a ni. Social Welfare Department chuan kum 2006 khan survey a nei leh, hetah hian tlemin a tlahniam ta deuhva, mi 7,610 an ni. Social Welfare Department survey neih dan thlirin an hmuh chhuah hi a rintlak thawkhata ngaih a ni. Kan pi leh pute khan ‘ Piansualin tlai luat a nei lo ‘ tiin, piangsualte chu hmusit lo tur leh chhawm dawl fo zawk turin an inzirtir thin a. Chu chuan vawiin ni thleng hian Mizo zingah kawng tamtakah awmzia a la nei niin a lang a, hei bakah hian kan sakhaw vawn min zirtirna vang pawhin piangsualte hian ngaihsak an hlawh ti ila a dik awm e.
Rualbanlote hian kawng tamtakah ngaihsak an hlawh ngei mai, amaherawhchu awlsam zawk leh nuamsa zawka an chetsawna an kal vel theihna tur lam hi kan hlamchhiah ti ila a dik ang. Hman ni mai khan Delhia tlawmngai pawl pakhat chuan heitang lama Mizorama hma lakna tur kawng dapin zirhona Aizawl-ah an rawn buatsaih nghe nghe a ni. He zirhonaah hian mithiam te bakah rualbanlote tana thawk tlawmngai pawl aiawh te an tel a, thil tam tak sawi ho a ni a, heta thil pakhat lang chiang em em, phat rual loh chu, ‘rualbanlote te tan, Mizoramah hian kal vel a harsa’ tih hi a ni.
Vantlang hmun, puipunna tura hmun siam leh in sak reng rengahte rualbanlote tana remchangve tur ruahmanna hmuh tur a vang em em a ni. Aizawl khawpui lailia huau huau neihna ber, Vanapa Hall-ah chuan wheel chair hmanga kalna tur a awm lova, inthiarna hmunte pawh pianphunga rualbanlote tana hman tur bik ruahman a awm hran lo. Chutiangin State Guest House te, Tourist Lodge te, YMA Hall te, Community Hall te bakah Biak In zawng zawng deuh thaw-ah hian wheel chair hmanga kal ngai te tan ruahmanna a awm lo a ni.
Aizawl Development Authority –in Building Regulations 2008 a kalpuiah chuan rualbanlote tan remchang siam ngei tur a ni, hei hi khawu taka kenkawh a nih loh chuan hmun tam takah kan ti leh lo mai ang tih a hlauhawm a ni. Townbus zawng zawng-ah hian wheel chair hmanga lawn theih ni rih lo mahsela, thenkhatah tal hi chuan theih ve tawh sela, chutiangin a chhungah pawh wheel chair chawpa chuan theih hlan a ngahhlehawm hle mai !

RUIH LUNGKHAM

2009-04-03T09:50:00.002+05:30

Ram dang leh State dang kan ûmphâk lohna tam tak pawh kan ‘mind set’ fuh loh vâng a ni a, re-set a ngai a ni. Kan rilru sûkthlek dân a changkâng lova, ‘chumi kha mi ramah chuan zu an khap lo, mahse an buaipui lo’ te kan han ti ve ngawt a, an rilru put ang pu pha ila kan buai bik lovang, khap kher a ţul bik lovang. Ramdanga zu inmi kan phâk ve lova, kan economic dinhmun en lovin, thawkrim te’n an thawhrim rah an chen chu, that chhe zawk leh intodelh lo tak hian kan thîk a, nitina inhlawh chawp pawhin zu in kan tum a, a in mai duhtâwk lovin ruih kher kan la tum cheu hi chu a zahthlâk tak zet a ni. Grape leh kawlthei tui te hi a ţangkai zawngin a hman theih tih a lang reng a, chu chu a chîngtu te duh dân pawh a ni. Nimahsela a in duhte in tum dân leh duh chhan lam hi a fel fai tâwk lo tih hi zêp rual a ni lo. Kan ruih duh vang chauh a ni. Vaiin Denrite a hmuhin a rilruah thil châr tur a lan laiin, kan ţhalai te rilruah chuan ruih a lang a, Proxyvon, cough Syrup leh Tablet dang dang te chu hnam dangin damdawi-ah an hmanga, an dam phah a, an nunkhua a sei phah mêk a, kan ţhalai thenkhatte chuan ruihna tur atan an ngai tlat a, natna thalo tak tak thlen tirtuah an hmang a, an nun a tih tawi phah thung.
Zu ruih chungchang bikah chuan Zu inmite vek hian ruih loh inzirtir a tul tawh niin ka ngai, Pulpit leh YMA platform atanga thusawi hi a dawngsawng tura beisei te hian an dawh fuh pha lo. Heti taka ‘Ruih kan lungkham’ mai hi kan mutan bera chu a ni; Dân lam neih ţhat pawh hi a pawimawh rualin kan rilru put hmang kan her rem tel si loh chuan a hlawhtlinna a sâng thei dâwn ngai lo.
‘Ruih kher duhna’ level atanga ‘ruih a tul kher lo’ level-ah a inmi tam zawk kan kaisan theih hlauh chuan ruihtheih thil te hi khap buai a ngai lovang. He ngaihdan hi Zu inmite zingah vung taka inzirtir theih ni tak ang maw ? Piangthar sawi chhiatna lam ni hauh lovin, heng zawng zawng ti thei tur hian pianthar pui pui pawh a tul lo. He khawvel ram zauvah hian Christian nilo, rui buai kher lo an tam em hi maw ! Khaw hawi a zau poh leh rualawh a na ting mai zawng a nih hi !

LO IN HAL TAK HI CHU AW !

2009-03-21T19:39:00.000+05:30

Hotute hnung zuina lamah vawin chu Mizoram Larsap motorah ka'n chuang ve khauh mai a! Mumang lam pawh a ang e. Aizawl khawpui dung tluanin kan thlen chin apiangah traffic a freeze zel a, minute rei lote-ah City Park atangin Tourist Lodge kan thleng vat mai. Larsap chuan kawng tluanin 'Mizovin lo in hal thin tak hi chu aw ' a ti vawng vawng mai a, tun anga kan kal zel a nih chuan kan ngaihtuahawm dan tur min chhut pui a ni... Nimahsela, Garden colony, MIP leh NLUP te hian he hreng ata hi min la khul chhuak thei si lo!

CHAPCHAR KUT A NUAM

2009-03-13T19:28:00.002+05:30

Mizote Jerusalem Aizawl-ah vawiin chu Chapchar Kut ka hmanga, a nuamin a hlimawm hle mai.Kan khawpui berAizawla thalaite western, europe leh khawchhak fashion-in a chim pil mai dawn emaw kan tih laiin, Aizawl nula leh tlangval sang tam tak rual, Mizo hnam incheia mawi tak taka hnam lama kan han lam dual dual mai chu(h)! a thalmuanthlak e, kan chai dual dual a, chhawng kan hnawt bawk a... ! Mizo nih a nuamin, dam man a awm e. Mahni hnam Lam leh inchei ngai nep tu chu mi piang sual a ni...Khawvelah tumahin an ngaisan lovang..kan CM, Kut Pa meuh pawh Mizopa incheiin, iptepui nen, kelawngin a lo kal a !

HELAM BAWK

2009-03-13T18:35:00.004+05:30

Hmeichhiate zahawmna hum tura tha taka Dan kenkawh a ni dawn a, hemi rual hian saruaka thlalak leh video siam mai mai lo tura inzirtir a pawimawh tel a ni. Mimal nun chu kan sawi pha lo a ni mai thei, nimahsela thil tha lo leh mawi lo laka fihlim tura kan inzirtir erawh chu kan ti thei.
Central KTP-in hmanni maia Kohhrana rorel inkhawm an neih khan Saruak thlalak leh a kaihhnawih hluar ta lutuk tiziaawm tura hmalak ni rawh se tih sawi ho a ni a, Synod Social Front-in hma a la mek a, an ni hian tualchhung product sex video clip 100 chuang an khawn khawm tawh nia hriat a ni ! Young Women Christian Association pawhin thlalak tha lo tak tak siam lo tura fimkhur a tul thu an sawi.
Midangte tihming chhe zawnga thalak leh video tha lo thehdarh dona kawngah, thehdarh theih sex video siam lo tura hmalak tel a ngai. Sex video hi ruihhlo leh ruihtheihthilte nen a inkungkaih duh khawp leh nghal a, tun anga kan kal zel chuan sex video siam an awm zel lovang a tih theih ta loh e. Hmeichhia leh mipa thliar chuang lova hrem ngai apiang hrem tura ruahmanna siam pawh a tul dawn niin a lang.

INCHHUNGKHURA MIZOHMEICHHIATE DINHMUN

2009-03-04T20:41:00.001+05:30

Kan ram pumpui thlir chuan hmeichhiate dinhmun ziaawmna ber pawl kan ni a, chuti chungpawhin hmasawnna tur leh hma bak tam tak kan la nei a ni.
National Family Health Survey-in tun hnai maia an hmuh danin Mizo zingah nupui kutthlak ching zaa 22 vel an awm a ni. Mizo hmeichhe zingah kum 15 atanga kum 49 inkar-ah mi 4 zinga pakhat zelin hetianga pasalte kutthlak hi an tawk a ni. Mizo hmeichhia 5 zinga 1 zelin an pasal te’n an beng thin tih an sawi a, za zela 5 atanga 7 te chuan an pasal ten an ban herhsak te, an lua keh te, nam vak te, thin nawk nawk te, an lam hawia thil vawm te, pet te leh vuak te an tuar niin an sawi a ni.
National Family Health Survey-in a zirchianna atanga a lan dan chuan, hetianga insawisakna hi chhungkaw rethei deuh leh zu chiahpiah chhungkuaah a thleng nasa zual a, mipa thenkhat chuan an pate tih dan an chhawm nia ngaih a ni bawk. Sawisak tawk hmeichhia zaa 13 te chuan an pasal ten zu an in thin tih an sawi a ni. Hetianga kut tuar hmeichhiate hian tanpuitu an hmu lo tih theih deuh thaw a ni.
Mizo Society-ah hian hmeichhiaten him tawk lohna tam tak an la nei a, pasal te’n an duh hun hunah an ma mai a, ro leh chanvo sawi hleih theih lova inthen a la thleng reng a ni. Hemi kawngah hian hmasawnna rahbi pawimawh tak pakhat chu tihhlawhtlinin a awm tawh a, chu chu The Mizo Divors Ordinance 2008, nikum October thlaa tih chhuah tak kha a ni. Hei hi Dan a la tling lova, Mizoram Legislative Assembly-ah pass phawt a ngai a, pass a nih veleh, pasalin a nupui a mak dawn pawhin Dan hmanga chinfel a ni ve tawh dawn a ni. He Dan hian nupa inthen nikhuaah nupui te dikna leh chanvo a humhim tak tak tawh dawn nia ngaih a ni.
Tunah hian Mizoramah chuan hetianga pasal te’n an nupuite kut an thlak chungchanga zualko duhte tan zualkona siam a ni tawh a, hemi chungchanga mawhphurtu Department chu Social Welfare Department a ni. Kut inthlak chungchanga Pasal te laka vuivaina nei chuan Social Welfare Department-ah zawh chian theih a ni a, tin Aizawl leh Lunglei District atan phei chuan ruatbik thawhpui tlawmngai pawl te pawh dah a ni a, a hre chiang duh chuan he Department-a thawkte hi zawh chian theih reng a ni. Khawvel hmasawn leh changkang zelah, chhungkua leh nupa inkar nun te pawh hian hma a sawn tel a ngai a, hmanlai ngaih dan atthlak tak tak te kha kan hnawl chhoh zel a tul a, a lian a te min hrut rualtu, Dan hmanga engkim kalpui a him tial tial dawn a, mitin kan fimkhur deuh deuh pawh a tul dawn a ni.

HMEICHHIAT MIPAT HMAN KHAWLOHNA LEH MIZOTE

2009-03-02T23:13:00.001+05:30

Mizoram-a kohhran lian ber, Mizoram Presbyterian Kohhran hmeichhia te chuan tun thla ni 7 khan Mizorama hmeichhiat mipat hman khawlohna chungchang bih chianga zir hovin, a tih bo theihna kawng an ngaihtuah a ni.
Hmeichhiat mipat hmankhawlohna chungchang hi christian society-ah pawh thil awm ve fo ni mahsela, hluar taka awm tur chuan ngaih a ni lova, a chhan pawh christian inzirtirna-in a do tlat a, hetiang thila inthiar fihlim tura inzirtirna chu fir taka kalpui a ni. Amaherawhchu hetiang a nih lai hian, christian society-a sawi theih, Mizo society-ah hian hmeichhiat mipat hmansualna hi a hluarin, Mizoram pawhin a hmingchhiatpui ta hle nia ngaih theih a ni.
Tun hma chuan Mizo mipa zingah hmeichhiat mipat hman chungchangah ngaihdan âtthlâk tak an nei ţhin a, chu chu Kristian kan nih hma leh hnam mâwl tak kan la nih lai, pi leh pute hun lai tak tak kha a ni. Amaherawhchu hetih hunlaia ngaihdân âtthlâk tak hian ţhangtharte min ûm thui hle a, tlangval ţhenkhat chuan hmeichhe kawp tam an la chapopui a ni âwm e. Heng ho hian rinawmna hlutzia hre lovin, hmeichhiat mipat hmankhawlohna ckawngah an kal bawrh bawrh a ni ber mai. Hei hi hnam mâwl kan nih lai ata tawh, Mizo zinga ngaihdân ţha lo, mi ţhenkhatin tûn thlenga an la neih tlat a ni ti ila kan sawi sual âwm love. Khawvêl lo changkâng zêlah Mizote pawhin mual êng kan kîl pha ve ta a, thiamna kawngah pawh rual kan awt bik lutuk ta love. Amaherawhchu chutih ruala harsatna kan tawh chu, Media avanga ţhalai tam tak kawng dik lo zawh an awm ta mek zel hi a ni. Mithiamte chhut dan chuan zahmawh rawngkai website nuai 4 chuang a awm a, nitin 200 dang a pian belh bawk a, internet hmangtu za a 40 chuangin heng website te hi an tlawh a ni.
Kan khawpui tual laiah milem dukdaklo tam tak CD-a lei theihin a awm a, an zuar kual reng bawk a, mobile handset lah chu ţhalai tam takin an nei a, a hman khawloh nasat theih dan tur chu kan hre thei mai awm e. Music leh fashion-te pawh hi hmeichhiat mipat hmankhawlohna hmanraw ţangkai bera ngaih a ni ta zêl a. Hmeichhia leh hmeichhia emaw, mipa leh mipa emaw, mahni anpui nena nupa anga awmduhna te, mahni nihna lo zawka khawsak châkna te pawh hi media, music leh fashion te hian a thlen thei nia ngai an awm a ni. Tun laia music leh fashion lar tak pakhat, ‘Emo’ pawh hian belh chian a dâwl lo nia ngai an tam tawh a ni. Mizo te hi uar lam nei hluai ţhin kan nih avang hian, Emo fashion te pawh hi dâp chhuata tla hawlh thawih thawih pahin kan chîng chho ve leh zêl mai thei a ni.
Mizoram Police Crime Conference, thla hlui ni 9-a Aizawla neihah nikum aiin kuminah pawngsual case a tam tih târ lan a ni. Sex hman khawlohna hian huang a zauh tial tial emaw tihmai tur a ni a, pawngsual hriat theih chinah naupang kum tlinglo pawng sual a la tam ber leh nghal a ni.Kumin June thla thlenga pawngsual case 37 chhinchhiahah 24 chu kumtlinglo pawngsual case a ni. Kum 2006-2007 chhung khan kohhran lianber Presbyterian chuan hmeichhiat mipat hman khawloh vanga a member thunun zât chu Sang 9 leh 92 a tling a, kohhran dang te thunun nen belhkhâwm ta ila Sing 2 dâwn lai an tling thei ngei ang. Kohhranin a thunun kher loha lo khawsa te nên chuan an tam dan tur chu chhût ngam pawh a ni lo hial ang. Heng zingah hian kohhran leh khawtlânga inhmang leh hruaitute an bang hauh lo a ni. Sex hman dikloh pawizia zirtirtu bera ngaih, kohhran rawngbawltute ti mualpho fo tu chu Sex hman diklohna hi a ni fan mai. Hetiang hi kan dinhmun a nih avangin Sex hmandiklohna hi tih tak zeta zir chiana hma lakna tur mumal tak duan a ngai ta a ni.
K.S langsâr ni lo, a rûka KS an tam tih a ni. Hei vang hi a ni pakhat ngei ang, natna hlauhawm ber, AIDS pawhin kan bu zawl a luah ţan ta reng mai. Aizawl khawpuiah ringawt pawh KS 700 chuang an awm niin a zir chiangtute chuan an sawi. Recharge Coupon leh Top Up atana inphalrai duh mai pawh engemawzat awmin an sawi tawh a ni.
Kan society hi politics tha lo, ruihtheihthil leh hmeichhiat mipat hman diklohna hian min khawih mêk a ni ber a, kil khat aţanga siam rem mai theih a ni lova, pâwl pakhat ţan lâk vakna pawh a sâwt hlei thei meuh lovang. YMA chuan ruihhlo do turin kumpuan a kalpui a, poitics dik minzirtir turin MPF a ding a, Sex hman khawlohna hluar ti reh tur hian tunge lo thawk chhuak dâwn ? Chhungkua, khawtlang, tlâwmngaipawl leh kohhran te’n kan dinhmun hi mualphopui ngama ţan an lâk a ţûl a ni. Pawngsual chungchangah hian MHIP lam hian hma an la thin a, a ţha viau mai, amaherawhchu pawngsualtu mipa lam hi hetiang kawnga fimkhur tura inzirtirna hi a tam lo a ni. Pawngsualna kawnga pawikhawihtu ber mipa-te hi an phu tâwka hrem chu aţul a ni, amaherawhchu pawngsual duhna sual laka fihlim tura mipate inzirtir hi thil pawimawh ber pakhat chu ni a, helama inzitirna hi mipate zingah nei tam tâwk ila, pawngsual case thenkhat hi chu a pumpelh theih ngei a rinawm.

MIZORAMA RAMDANGMITE CHUNGCHANG

2009-03-02T21:21:00.000+05:30

Central YMA chuan khawchhak unau te’n tunhnaiah Internet hmangin Mizo mipui leh YMA te chu an chunga hleilen viau nia diklo taka thehdarhah a ngai a, hei vang hian foreigner te chungchang hian ngaimawh leh ngaihven a hlawh thar leh ta mek a, Mizormah khawchhak unaute hi mi nuaih khat emaw zet an awm nia an insawi bawk avangin Central YMA chuan a Branch-te chu an Br. Huam chhung theuhah foreigner census a neih tir dawn ta nghe nghe a ni.
Kan ţhenawm ram, Myanmar hi Sipai rorêlna a ni a, ei leh bâr-ah an harsa êm êm tih kan hria, chubakah Democracy tun nun tum pawl zinga mi tam tak chu Sipai sorkara-in man tumin a veh reng bawk a, heng thilte leh thil dang dang avângin Myanmar aţangin mi ţhahnem tak Mizoramah an lo lût a, engemawzât chu an inbêngbela, nupui pasal neiin India khua leh tuiah engemawzât an insiam tawh a, tam tak inhlawhfa-in an awm reng a, sumdâwnga Burma leh Mizoram kârtawn mi ţhahnem tak an awm a, Aizawl Bazarpuia sumdawnna tam tak an kutah a awm mek a, inlam leh office lam thlengin nepnawi zuarin an pal tawn reng bawk.
Ramdang mi kan mikhual mêk te leh rawn inbengbelte hian Mizoram tân thil ţha engemawzât an rawn thlen a, dân ang thlapin an lo lût emaw lût lo emaw lam chu thu hranah pawh dah ta ila, sualna hrang hrang kan tawrh zingah, kum hnih kum thum kalta maia sualna hrang hrang record-ah chuan Burma lam aţanga lo chhuk thlate inhnamhnawihna a tam ber a ni.
Hmanah deuhah khan Chanmari Vênga naupang pâwngsual chungchâng thu kal zêlah Burma mite Mizoram chhuahsan vek tura hmalâkna a awm tawh a, kha thil thleng kha kan la hre ţheuhin a rinawm. Khami ţum khân Burma lama kan unaute’n harsatna an tâwk nasa êm êm a nih kha. Hun a lo kal deuh a, zawi zawiin politiks thila harsatna an tawhte kan hriat thiampui deuh deuh a, tunhnaia Myammar rama politics inlumlet chungchangah pawh Myanmar rama Democracy din a nih theih nân mi ţhenkhatin Aizawl-ah pawl te siamin hma an la hial a ni.
Politics dinhmun harsatna inhriatthiampuina kan neih rual hian invênna tur leh hmalâkna tur pawimawh tak tak a awm tih erawh chu kan hre tur a ni. Democracy kan duhpuia kan nawrpui rualin Mizoram chhûnga sualna tipung lo zâwnga an nungchang leh awmdân fimkhur thiam tûra zirtir pawh kan tih tur a ni tel a ni. Bike bo tam ber chu Burma ramah phurh chhoh a ni. Hetiang sualna kawnga inhnamhnawih mante chu Burma a tanga lo kal deuh vek an ni. Thawkkhat lai khan Sailam khuain an ram chhehvêla Naubân chikhat an humhalh lai chu Burma mi pahnihin zan lamah a ruka an la lai an man bawk a nih kha. Chutiangin Solar Disk bo engmaw zât chu Burma lamah phurh choh nia sawi a ni. Tualthihna, rukrûk, insuam leh sualna dang lian tham tak tak te chu khawchhak lam unaute inhnamhnaawihna a ni deuh zêl a ni. Drugs case chungchâng phei chu an hauh deuh vek a ni.
Khawchhak unaute hian an ram chhûnga an dinhmun tleu zia hriaa lo hrethiamtu, Mizoram mipuite zinga awmdân an thiam loh chuan harsatna an tâwk leh palh thei tih an hriat reng a ngai a, an mahni leh an mahni ngei an inzirtir a ţul a ni. Mahni tâl tâl a, duh hawi zâwng zâwnga an khawsak mai chuan a ţha dawn lova, tuna an khawsak duh dân aţang hi chuan fimkhurna tur an nei tam hle ti ila kan sawi sual âwm love. Burma mi, pâwl ho emaw, kohhran emaw an awm a nih chuan Mizoram chhûnga khawsak dân tur nasa taka an inzirtir a ngai, Mizorama thilsual ti te’n Ţiau an kân hman phawt chuan him tura an inngaih chhûng chuan, sualna do kawngah khawchhak unaute hian Mizoram mipuite hi min thurualpui tumna tak tak an nei lo tihna a ni ang. Chuvângin an inenfiah a ngai a, misual an nih chuan Ţiau an kân avânga an himna ngawtna chhan tura awm chuang lo a ni. Misual man leh zawn chhuah hi kan zavaia mawhpurhna a ni a, Mizorama pawi khawihtu, Myanmar rama tlânlût man leh theih dân chungchâng pawh khawchhak unaute’n mawh an phurh ve ngam a ngai a, chu chu tun thleng hian an tih âwm hriat tur a vang rih hle a, Mizoram mipui tam tak chuan Mizoram mipuiten kan lo mikhual zel dan tur hi anmahni khawchhak unaute awmdanah a innghat lian ber a ni tih hi an ngaih dan a ni tih a lang a ni. Ngaihzawnawm taka an awm loh chuan, an mahni leh an mahni an in tlawhping zel dawn a ni. Rimawi khawvel,infiamna leh Arts lamah te phei chuan Myanmar lama Mizo hnahthlakte’n Mizo ram an chawknung em em a, Mizo mipui pawhin thliarna an neih awm hriat a ni lo.
Hnam leh hnam, chi leh chi tizâwnga thil kal tir a ţha lova, amaherawhchu kan mikhualte avânga kan rama sualna pung erawh hi chu fimkhur taka a tihtâwp dân kan zawn tlân vat loh chuan kan inpumkhatna leh inhriatthiamna a tla hniam zel anga, chu chuan harsatna lian zâwk min hma chhawn tir thei a ni.